Нега “Манчестер Сити”да қозоғистонликлар эмас, Ҳусанов ўйнаяпти?
Абдуқодир Ҳусановнинг Англия Премьер-лигаси гранди “Манчестер Сити”га кўчиб ўтгани кўплаб мамлакатларга овоза бўлди.
20 ёшли марказий ҳимоячининг дунёнинг энг қудратли клубларидан бирининг шарафини ҳимоя қилаётган ҳали ҳамон кенг муҳокама қилинмоқда.
Хусусан, қўшни мамлакат – Қозоғистон футбол жамоатчилиги вакиллари ҳам ўзбек футболчисининг жаҳон футболининг энг нуфузли ва мураккаб чемпионатига кўчиб ўтганига ўз муносабатларини билдирмоқда.
Sports.uz портали Қозоғистон футболини ёритаётган манбаларнинг Абдуқодир Ҳусанов трансфери бўйича мутахассислардан олган фикр-мулоҳазаларини ўзбекистонлик футбол ишқибозлари эътиборига ҳавола этади.
Sports.kz сайти Қозоғистон терма жамоаси собиқ футболчиси Евгений Аверченкога мурожаат қилиб, “Нега “Манчестер Сити”да қозоғистонликлар эса, ўзбекистонлик Ҳусанов ўйнаяпти?”, деб савол берди.
Жавоб қуйидагича бўлди:
- Мен бу футболчининг фаолиятини синчковлик билан кузатмаганман. “Манчестер Сити”нинг “Челси”га қарши беллашувидаги дебютини ва голга сабабчи бўлганини кўрдим. Унга мослашиш учун ҳали вақт керак.
Ҳусановнинг қозоғистонлик футболчилар яққол ажралиб турадиган хусусиятларини санаш қийин. Бироқ у “Манчестер Сити”да ўйнаяптими, демак у бизнинг ўйинчиларда бўлмаган сифатларга эга, - деди Евгений Аверченко.
Яна бир манба – sportarena.kz сайти “Қайрат Жастар” жамоаси бош мураббийи ёрдамчиси Тимур Касимовнинг Абдуқодир Ҳусановнинг “Манчестер Сити”га трансфери бўйича муносабатини эълон қилди.
- Мен унинг ўйинларини кўп кузатганман. Хусусан, Олимпия ўйинларида Испания терма жамоасга қарши учрашувдаги ўйинини кузатганман. Шундай дейишим мумкин: у юқори савияда ўйнади. Ҳусанов испанлар билан тенгма-тенг ўйин кўрсатди.
Шунингдек, унинг “Ланс”даги иштирокига алоҳида эътибор қаратишни истайман. Менинг фикримча, унинг Хосеп Гвардиола назарига тушишида ҳайратланарли нарса йўқ. Хосеп Гвардиоладек тажрибали мутахассис Абдуқодир Ҳусановдек талантларни топишни билади.
Ҳимоячи учун муҳим бўлган гавдаси ва маҳорати билан у ҳали узоққа боради. Бироқ иштиёқ ва қувватини сақлаб қолиши зарур, - деди Қозоғистоннинг энг маҳоратли мураббийларидан ҳисобланган Тимур Касимов.
Абдуқодир Ҳусанов “Бунёдкор” тарбияланувчиси ҳисобланади. Профессионал фаолияти давомида Беларуснинг “Энергетик-БГУ” клубида 37 та учрашувда тўрттадан гол ва ассист муаллифи бўлган.
2023 йилнинг ёзида Франциянинг ўша пайтдаги вице-чемпиони “Ланс”га кўчиб ўтган ҳимоячимиз жами 31 та учрашувда иштирок этди.
“Манчестер Сити” 20 январь куни Ҳусанов билан 4,5 йиллик шартнома имзолади. “Шаҳарликлар” ўзбек футболчиси учун “Ланс”га бонусларни қўшиб ҳисоблаганда 50 миллион евро тўлайдиган бўлди.
Шу тариқа, Абдуқодир Ҳусанов Ўзбекистон ва “Ланс” тарихидаги энг қимматбаҳо трансфер эгасига айланди. У янги жамоасида 45-рақамда тўп тепмоқда.
Фикрлар