Ҳусанов ортидан “топ-5” лигага кетадиган футболчимиз номи айтилди
Ўзбек футболи тарбияланувчилари секин-аста Европанинг етакчи лигаларини забт этишга уринмоқда. Бугунги кунда Абдуқодир Ҳусанов “Манчестер Сити” сафига қўшилган бўлса, Элдор Шомуродов фаолиятини “Рома”да давом эттириши ҳал бўлди.
Айниқса, 20 ёшли Абдуқодир Ҳусановнинг Англия чемпиони билан шартнома имзолагани катта шов-шув бўлди. Ўз навбатида, бу ўйинчимизнинг жаҳоннинг жнг нуфузли лигасига кўчиб ўтгани ўзбек футболига яхшигина реклама бўлади. Бунинг учун эса, легионеримиз “шаҳарликлар” жамоасида ўз ўрнини топиши, Франция лигасида амалга оширган ишларини Англияда такрорлаши талаб этилади.
Кейинги йилларда Европага йўл олиш имконияти юқори саналаётган ўзбек футболчиларидан бири Аббосбек Файзуллаев ҳисобланади. 21 ёшли ҳужумкор футболчига Германия, Италия, Испания ва Франция клубларидан қизиқиш бўлаётгани ҳақида хабарлар кўп тарқатилди.
Айни пайтда Россия Премьер-лигасида тўп тепаётган футболчимизнинг Европага кетиш имкониятига Москванинг “Локомотив” клуби собиқ президенти Николай Наумов муносабат билдирди.
- ЦСКА клуби Аббосбек Файзуллаевни Европага трансфер қилиш эҳтимоли катта. Бунинг учун ўзбек легионери ўйинини янада кучайтириши лозим. Чунки кейинги пайтда ўйинида бироз пасайиш кузатилди. Агар у аввалги даражасига кўтарилса, кучли лигаларга кетиши аниқ.
Европада Аббосга эътибор қаратишган, уни кузатиб келишяпти. Файзуллаев Европа даражасидаги ўйинчи. Қолаверса, Ўзбекистон миллий терма жамоасида ҳам муваффақиятли ўйнаяпти ва шу боис, доим скаутлар кузатувида. Унинг салоҳияти юқори.
Агар Абдуқодир Ҳусанов “Манчестер Сити”да яхши ўйнаб кетса, ўзбек футболчилари учун жуда яхши реклама бўлади. Кўпинча шундай бўлади, бир ўйинчи ортидан бошқаларга ҳам эътибор қарата бошлашади.
Ҳусанов яқинда Беларусда тўп тепарди, афсуски, биз кўпинчи ўйинчиларнинг салоҳиятини ўз вақтида пайқай олмаймиз, уни кўрмай қоламиз. Россия Премьер-лигаси Абдуқодирни қўлдан чиқарди, уни шу ерга олиб келиш керак эди.
Файзуллаев масаласига келсак, Аббос Европанинг исталган клубида пайдо бўлиши мумкин. Масалан, нега “Манчестер Сити”га бормаслиги керак? Ҳар нарса бўлиши мумкин. “Сити” Ҳусанов ва Файзуллаевдан иборат ўзбек тандемини кузатиш жуда қизиқ бўларди. Лекин бундай бўлиш эҳтимоли жуда кам, - деди Николай Наумов.
Эслатиб ўтамиз, Аббосбек Файзуллаев “Пахтакор” тарбияланувчиси ҳисобланади. 2023 йилнинг августида ЦСКА сафига қўшилганига қадар, ҳужумкор футболчи Ўзбекистон Суперлигасида муваффақиятли фаолт юритган.
Абдуқодир Ҳусанов футбол сир-асрорларини “Бунёдкор” академиясида ўрганган бўлса-да, профессионал фаолиятини Беларусда “Энергетик-БГУ” жамоасида бошлади. Бу жамоа билан шартнома имзолаганидан бир йил ўтиб, Ҳусанов Франция чемпионати вакили “Ланс”га кўчиб ўтди. Бу жамоада бир ярим йил ўйнаб, ўз салоҳиятини намойиш қилди.
“Манчестер Сити” ўзбек ҳимоячисини қўлга киритиш учун бонуслар билан қўшиб ҳисоблаганда жами 50 миллион евродан воз кечишига тўғри келди.
Фикрлар