Неймар “Сантос”нинг машғулотларига қатнашмасдан, клуб базасига суратга тушиш ва қаҳва ичиш учун келган

«Сантос» форварди Неймар жамоадошлари билан келиб чиққан можародан сўнг клуб раҳбариятидан рухсат олмасдан машғулотни ўтказиб юборди.

Маълумотларга кўра, 34 ёшли ҳужумчи 21 ёшли Габриэл Бонтемпони ҳақоратли сўз билан сўккан, шунингдек, 19 ёшли Жоао Ананьяс билан ҳам кийиниш хонасида тортишиб қолган. Бу ҳолат «Шапекоэнсе»га қарши Бразилия Серия А мусобақасининг 20-туридаги 2:2 ҳисобидаги ўйиндан сўнг содир бўлгани айтилмоқда.

Неймар эса кейинчалик ижтимоий тармоқларда бу ҳақдаги хабарларни рад этди. Унинг таъкидлашича, у жамоадошлари билан одатий суҳбат ўтказган, холос: «Бу бутун жамоа билан бўлган мулоқот эди. Нохолис ва ёлғон маълумот тарқатаётганлар воқеадан умуман бехабар», – дея жавоб қайтарган ҳужумчи.

O Globo нашрининг ёзишича, ўйиндан бир кун ўтиб Неймар «Сантос» базасига келган, бир неча мухлислар билан суратга тушган ва қаҳва ичган. Шундан сўнг у базани тарк этган ва асосий таркиб футболчилари учун мўлжалланган тикланиш машғулотида иштирок этмаган. Манбаларга кўра, бу қарор мураббийлар штаби режасида кўзда тутилмаган.

Шунингдек, хабар қилинишича, «Сантос» клуби директорлар кенгаши аъзолари ҳам базага келиб, кийиниш хонасидаги можарога ойдинлик киритишга уринган.