Ниҳоят, Александр Хомяков "Бухоро"да иш бошлади

Россиялик мутахассис Александр Хомяков билан боғлиқ турли гап-сўзлардан кўпчиликнинг хабари бор эди. Анчадан бери ишсиз юрганди, аммо унга таклифлар ҳам етарлича эди. Бироқ ҳа деганда Александр Андреевичнинг бирор-бир клубда ишлаши чўзилиб кетаётганди.

Охирги вақтларда эса унинг “Бухоро” клубида маслаҳатчи мураббий сифатида ишга киришиши кутилаётганди. Яқинда клуб бош директори Алишер Рустамов ҳам sports.uz сайтига берган интервьюсида Хомяковни клубда маслаҳатчи мураббий сифатида иш бошлаши мумкинлиги ҳақида айтганди. Ниҳоят, олинган маълумотларга қараганда, россиялик мутахассис чиндан ҳам “Бухоро”да маслаҳатчи мураббий сифатида фаолиятини бошлагани маълум бўлди. Энди у бош мураббий Жамшид Саидовга яқиндан ёрдам беради.

Эслатиб ўтамиз, бунга қадар Хомяков 10 йил давомида “Машъал”га устозлик қилди. Сўнг “Андижон” жамоасини ҳам бошқарганидан яхши хабардорсиз. “Бухоро” эса унинг юртимиздаги мураббийлик фаолиятида учинчи жамоасига айланди.