Нико Уильямснинг “Барса”га трансфери нега барбод бўлгани сабаби айтилди

Испаниянинг амалдаги чемпиони “Барселона” бир неча кун аввал катта трансферни амалга ошириб, Нико Уильямсни таркибга қўшиб олишга тайёргарлик кўраётган эди.

Лекин кетма-кет иккинчи йил Никонинг “Барса” трансфери барбод бўлди.

22 ёшли футболчи “Атлетик”да қолишга қарор қилиб, бильбаоликлар билан ўн йиллик шартнома имзолади ва бошқа клубга ўтиш масаласини ёпиб қўйди.

The Athletic нашри воқеалар нега кутилганидан терс ривожланганига аниқлик киритди. Манбага кўра, Нико Уильямс агентлари ўйинчининг шартномасига бир банд қўшишни талаб қилгани ишни бузган.

Унга кўра, футболчи томони “Барселона”дан Испания чемпионати бошланадиган сана – 20 августга қадар  Нико Уильямсни Ла Лига қайдномасидан ўтказишни кафолатлашни ва бунинг имкони бўлмаса, ўйинчига бошқа клубга ўтиш ҳуқуқини беришни талабни қилган.

Каталонияликлар спорт директори Деку бу талабни бажаришдан бош тортгани ортидан Нико Уильямс “Атлетик”дан кетмайдиган бўлди.