Нойер "Бавария" билан Осиё турнесига бормаслиги мумкин. Сабаби...

“Бавария” дарвозабони Мануэль Нойернинг умумий гуруҳ машғулотларига қайтиши кейинроққа қолдирилди.

Sky Sport Deutschland хабарига кўра, 37 ёшли посбон аввал режалаштирилганидек кейинги ҳафтадан бошлаб умумий гуруҳ машғулотларига қўшилмайди. Ўтган йилнинг декабрь ойида оёғи синган Нойер таътилдан қайтгач, тиббий кўрикдан ўтади.

Шифокорлар дарвозабонга тўлиқ машғулотларни давом эттириш учун кўпроқ вақт керак деб ҳисоблайди. Шундан келиб чиқадиган бўлсак, мавсум олдидан Нойер якка тартибда машғулот ўтказади ва катта эҳтимол билан “Бавария”нинг Осиё турнесини (24 июлдан 3 августгача) ўтказиб юборади.

Қайд этилишича, “Бавария” бош мураббийи Томас Тухель дарвозабоннинг тўлиқ тайёрлиги тасдиқланиши биланоқ уни майдонга туширишни режалаштирмоқда.