Нукусда белбоғли кураш бўйича Ўзбекистон чемпионати ўтказилмоқда

Бугун 22 ноябрь куни Нукус шаҳридаги Республика Якка кураш спорт турларига ихтисослаштирилган спорт мактабида белбоғли кураш бўйича 2008-2009 йилларда туғилган (U-15) ўсмирлар ва қизлар ўртасида Ўзбекистон чемпионати беллашувларига старт берилди.
Ўзбекистон Республикаси Ёшлар сиёсати ва спорт вазирлиги ҳамда Ўзбекистон белбоғли кураш федерациясининг йиллик тақвим - режасидаги мазкур мамлакат чемпионатида Қорақалпоғистон Республикаси, Тошкент шаҳри ва барча вилоятлардан 300 нафарга яқин ёш полвонлар белбоғли курашнинг белбоғли ва эркин йўналишларида ғолиблик учун кураш тушишмоқда.
Юқори савияда ташкил этилган мусобақанинг бугун тантанали очилиш маросими ҳам ўтказилди. Мазкур очилиш маросимида иштирок этган Қорақалпоғистон Республикаси Ёшлар сиёсати ва спорт вазири Адилбек Алланазаров, Ўзбекистон белбоғли кураш федерацияси бош котиби Абдихалил Маликов мамлакатимизда жисмоний тарбия ва спортга, хусусан, миллий спорт турларимизга бўлган эътибор туфайли полвонларимиз халқаро миқёсдаги чемпионатларда етакчилик қилаётганини таъкидлаб, барча мусобақа иштирокчиларига омад тилашди.
Чемпионат регламентига кўра, бугун ўғил болалар белбоғли кураш йўналиши бўйича ғолиблар аниқланади.
Мусобақа 24 ноябрга қадар давом этади.