Нури Шахин: "Биз Шомуродов каби тажрибали футболчини ёки Файзуллаевдек истиқболли ўйинчиларни жамоага жалб этамиз"

"Истанбул Башакшеҳир" мураббийи Нури Шахин "Газиантеп"га қарши тўқнашувдан кейин матбуот анжуманида иштирок этиб, жамоанинг трансферлар ойнасидаги сиёсатига тўхталди ва икки ҳамюртимизни эслаб ўтди. 
 
"Жамоани кучайтириш борасида очиғини айтганда, моддий томондан бироз қийналяпмиз, бу осон эмас. Ҳозирги таркибимиз жуда қимматли жамоа. Сифатни ошириш учун ё тайёр футболчи олинади. Масалан, Шомуродов каби ёки истиқболли ёш футболчиларга сармоя қилинади, Файзуллаев сингари. "Башакшеҳир" ҳар доим шу икки йўналишга очиқ бўлиши керак. Қайси позицияларни кучайтириш зарурлигини яхши биламиз. Скаутлар жамоаси ва спорт директори билан жуда яқин ишлаяпмиз. Раҳбарият билан келишган ҳолда кам, лекин аниқ трансферлар қиламиз. Ё сифатни оширамиз, ё келажак учун сармоя қиламиз, бунда ҳеч қандай муаммо йўқ", - дея фикр билдирди жамоа бош мураббийи. 
 
Маълумот ўрнида, Башакшеҳир сўнгги учрашувда рақибини 5:1 ҳисобида таслим этди. Шомуродов ўз ҳисобига гол+ассист ёздириб қўйган бўлса, Файзуллаев битта гол уришга муваффақ бўлди.