Ўзбекистон — Колумбия ўйини бошланмай туриб, мундиалда мутлақ рекорд ўрнатди
Футбол оламининг энг нуфузли мусобақаси - 2026 йилги жаҳон чемпионатида илк бор иштирок этаётган Ўзбекистон миллий терма жамоаси ҳали турнирга киришмай туриб, ёқимли рекордлар қайд эта бошлади.
Маълумки, футболчиларимиз мундиалнинг "К" гуруҳида Колубия, Португалия ва Конго Демократик Республикаси миллий терма жамоалари билан рақобатлашади.
Фабио Каннаваро бошчилигидаги жамоамиз тарихий илк учрашувини 18 июнь куни Тошкент вақти билан соат 7:00 да Колумбия терма жамоасига қарши ўтказади.
Айнан мана шу Ўзбекистон — Колумбия учрашувига сотилган чипталар сони 74 725 тани ташкил этди.
Бу кўрсаткич ҳозирча 2026 йилги жаҳон чемпионати учун сотилган чипталар сони бўйича мутлақ рекорд сифатида қайд этилмоқда.
- Дастлабки маълумотларга кўра, Ўзбекистон — Колумбия ўйинига 74 725 та чипта сотилган. Ҳозирча бу жаҳон кубогидаги барча ўйинлардан кўп. Жумладан, очилиш баҳси Мексика — Жанубий Африка (73 373) ва Бразилия — Марокаш (73 719) учрашувларидан ҳам юқори, — деб ёзши ўзбекистонлик футбол функционери Алишер Никимбаев ўзининг телеграм-каналида.
Футбол бўйича жаҳон чемпионатининг очилиш ўйини Мехикода (Мексика) жойлашган "Ацтека" стадионида Мексика ва Жанубий Африка терма жамоалари ўртасида ўтказилади.
Ўзбекистон ва Колумбия термалари ўртасидаги баҳс ҳам мана шу стадионда, "K" гуруҳи доирасида, 18 июндан 19 июнга ўтар кечаси бўлиб ўтади.
Мехикодаги афсонавий "Ацтека" стадиони 81 мингдан ортиқ томошабинни сиғдира олади. Маълум қилинишича, Ўзбекистон — Колумбия учрашувига бўлган катта талаб, аввало, Шимолий Америкадаги йирик ва фаол колумбияликлар диаспораси, шунингдек, маҳаллий мексикалик мухлисларнинг очилиш ўйинига нисбатан анча арзонроқ бўлган гуруҳ босқичи чипталарига қизиқиши билан изоҳланмоқда.
Фикрлар