Ўзбекистон Марказий банки терма жамоанинг мундиалдаги иштирокига бағишланган танга чиқарди

Ўзбекистон Марказий банки мамлакат тарихида илк бор жаҳон чемпионатига йўл олган миллий футбол жамоаси шарафига коллекцион танга чиқаришини маълум қилди. 

Марказий банк телеграм-каналидаги хабарда янги танга “Биринчи мундиаль. Биринчи тарихий танга” шиори остида тақдим этилган.

Маълумотга кўра, танганинг бир томонида жамоа таркибидаги 26 нафар футболчининг силуэтлари тасвирланган бўлиб, улар бир бутун “Оқ бўри” шаклида жамланган. Матбуот хизматига кўра, бу композиция тарихий натижа алоҳида маҳорат эмас, балки жамоавий руҳ ва бирдамлик самараси эканини ифодалайди.

Коллекцион тангалар чекланган миқдорда чиқарилади: 100 дона олтин ва 1 000 дона кумуш танга. Уларнинг савдоси 18 июндан бошланади.

Эслатиб ўтамиз, 2025 йил 5 июнь куни Ўзбекистон терма жамоаси жаҳон чемпионати–2026 саралаш босқичи доирасида сафарда БАА терма жамоасига қарши майдонга тушиб, 0:0 ҳисобидаги дурангга эришган эди. Мазкур натижа Ўзбекистон терма жамоасига тарихда илк бор жаҳон чемпионатига йўлланма олиш имконини берди. Мусобақа 11 июндан 19 июлга қадар АҚШ, Канада ва Мексика ҳудудида ўтказилади.