Ўзбекистон яна иккита медаль олиб, Осиё ўйинлари рейтингида кўтарилди

Ўзбекистон терма жамоаси Аичи ва Нагояда (Япония) ўтаётган 2026 йилги Ёзги Осиё ўйинларининг иккинчи кунида бирдан иккита — олтин ва бронза медални қўлга киритди. 

Мусобақадаги илк олтинни мамлакатимиз термасига каратэчи Абдулваҳоб Рашидов тақдим этди. У кумитэ бўйича эркаклар ўртасидаги беллашувларда 67 килограммгача вазн тоифасида чемпионликни қўлга киритди. 

Ҳал қилувчи финал жангда Рашидов Япония вакили Юго Козакини 7:5 ҳисобида мағлуб этиб, Осиё ўйинлари чемпионига айланди.

Микс яккакурашлар бўйича бронза медалини эса Нодирбек Шавкатов қўлга киритди. У "modern" йўналишида 71 килограммгача вазн тоифасида иштирок этди. Ярим финалда ўзбекистонлик спортчи Қозоғистон вакили Қодирбек Шинбаевга 0:3 ҳисобида мағлуб бўлди ва мусобақани учинчи ўрин билан якунлади.

Ўзбекистон термаси ўзининг илк медалига Осиё ўйинларининг очилиш куниёқ эга бўлган эди. Ҳумоюнмирзо Ҳалимов каратэ бўйича 55 килограммгача вазн тоифасида кумуш медални қўлга киритган.

Шу тариқа, ҳозирча Ўзбекистон терма жамоаси ҳисобида учта — битта олтин, кумуш ва бронза медаль мавжуд. 

Биринчи кун якунига кўра 16-ўринда турган жамоа эндиликда Мьянма билан биргаликда умумжамоавий медаллар жадвалида 9-поғонага кўтарилди. Пирмирликни 38 та медаль жамғарган Хитой сақлаб турибди.