ОЧЛ 2. Максим Шацких: "Мухлисларни "Бобур арена"да кутамиз, уларни қўллаб-қувватлаши бизга керак"

Эртага “Андижон” ОЧЛ 2 доирасида Баҳрайнинг “Ал-Халдия” жамоасини қабул қилади.

Бугун “Бобур арена”да стадионида учрашув олдидан матбуот анжумани бўлиб ўтди. Унда мезбонлар устози Максим Шацких ва ҳимоячи Шахзод Азмиддинов иштирок этдилар.

Максим Шацких: “Хайрли кеч. Эртанги ўйин ҳақида гапирадиган бўлсам, шуни айта оламанки, биз эртанги учрашувга яхши тайёргарлик кўрдик. Рақибни таҳлил қилганимизда бу жамоани гуруҳимиздаги жамоалар ичида, ўтган сафарги рақибимиз - Қатар клубидан кучлироқ деб айта оламан. Ўйин ташкил этиш жиҳатидан ҳам яхши жамоа. Жисмонан бақувват футболчиларига эга ва тезкор жамоа. Умид қиламанки, эртага биз ўзимизга керакли бўлган натижани қўлга киритамиз. Рақибни услуби ва кучидан келиб чиқиб учрашувга тайёргарлик кўрдик. Умид қиламан, эртага мухлисларимиз олдида яхши натижа кўрсатамиз”.

Шахзод Азмиддинов: “Ассалому алайкум. Жамоамизда кайфият зўр. Ўйинга келадиган бўлсак, гуруҳимиздаги энг қийин учрашувлардан бири бўлади. Қўлдан келганича ҳаракат қилиб, “Бобур арена”да уч очкони қўлга киритишга интиламиз. Мураббийлар штаби билан кучли ва кучсиз жиҳатларини ўрганиб чиқдик. Ҳамма мухлисларни кутиб қоламиз ва уч очко “Бобур арена”да қолади, деган умиддаман.

- Охирги учрашувларда ҳимояда муаммолар борлиги кўриняпти. “Шўртан”ни мағлуб этган бўлса ҳам дарвозасидан голлар ўтказиб юборди. Қисқа давр ичида ҳимоядаги муаммоларни йўқотишга ҳаракат қилиндими?

Максим Шацких: - Ҳар бир машғулотда айнан шу чизиққа эътибор берамиз. Хато қилмасликка ҳаракат қиламиз. Олдинги учрашувдаги хатолар тактик хато эмас, балки техник хато эди. Барчамиз инсонмиз ва барчамизда шунақа хатолар бўлади. Машғулотлар давомида шунинг устида ишладик. Ўйлайманки, эртага олдинги ўйинда қилган хатоларимизни қилмаймиз.

- Исмоил Акинаде қандай ҳолатда? Балки у эртага майдонга тушар.

Максим Шацких: - Ҳар куни майдонга қайтиш учун машғулотларда тер тўкиб ишламоқда. Эртага у асосий таркибда майдонга тушадими ёки захирадами, айта олмайман. Қолаверса, эртанги учрашувда “Бобур арена”га кўплаб мухлисларимиз келишларини кутамиз. Чунки уларнинг қўллаб-қувватлашлари бизга керак.

- “Ал-Халдия” ўтган турда ғалаба қозонди ва рақиб ўрганиб чиқилганини айтдингиз. Сиз учун рақиб сафидаги қайси бири хавфли футболчи сифатида кўриняпти?

Шахзод Азмиддинов: - Уларни кўриб чиқдик. Ҳамма ўйинчилари кучли. Олдинги чизиқдаги 99-рақамли ўйинчиси бақувват ва тезкор экан. Ўша футболчини “ушлаш”га ҳаракат қиламиз. 19-рақамли футболчиси ҳам яхши экан. Паслари зўр. Худо хоҳласа, биз тайёрмиз, нолга “ушлаш”га ҳаракат қиламиз. Худога шукр, ҳали Осиё Чемпионлар лигасида тўп ўтказиб юбормадик. Охиригача шу темпда кетишда давом этамиз.

- “Шўртан” билан учрашувда йигитларда руҳий ёки асабий чарчоқ бўлдими? Жисмоний жиҳатдан тайёр бўлишинглар мумкин. Лекин эртагалик ўйинда футболчиларни руҳий ҳолати қанақа?

Шахзод Азмиддинов: - Ҳар томонлама тайёрмиз. ОЧЛни ўз номи бор. Ҳамма бунга бошқача “настрой” билан тушади. Худо хоҳласа, ҳамма тайёр. Уч очкони қўлга киритишга ҳаракат қиламиз.