ЎФА делегацияси яна ФИФА нигоҳида

Барчага яхши маълумки, охирги йилларда юртимиз футболининг ривожланиб бораётгани фонида жаҳон футболи нигоҳида бўлиб турибди.

Миллий терма жамоамизнинг тарихда илк бор мундиалга йўл олиши, U20 жаҳон чемпионати мезбонлиги Озарбайжон билан биргаликда Ўзбекистонга топширилиши, ўтган йили футзал бўйича жаҳон чемпионатини юртимиз мезбонлигида юқори савияда ташкил қилингани ҳам ФИФА томонидан ўзбек футболига қаратилаётган эътиборнинг жиддийлигини кўрсатиб турибди. 

ФИФА президенти Жанни Инфантинов ҳам бир неча бор ўз чиқишларида мамлакатимизда футболнинг ривожланиб бораётганини мамнуният билан айтиб, жуда илиқ фикрлар билдирган.

Яқинда АҚШда бўлиб мундиал учун қуръа ташлаш маросимида ҳам Инфантино юртимиздан борган делегация билан учрашган ва ўзининг эзгу тилакларини билдирган. 

Айни пайтда ҳам ЎФА делегацияси ФИФА ташкил этаётган тадбирда бўлиб турибди. Бу хусусида ЎФА матбуот хизмати маълум қилди. 

"Аввал хабар берганимиздек, тарихда илк бор Ўзбекистон футбол ассоциациясининг уч нафар вакили ФИФА қўмиталари аъзолигига сайланганди. Доҳа шаҳрида ФИФА қўмиталарининг ялпи учрашуви бўлиб ўтди.

ЎФА биринчи вице-президенти, ФИФА футбол технологиялари, инновациялар ва рақамли ривожланиш қўмитаси раиси ўринбосари Равшан Ирматов мазкур қўмитанинг илк йиғилишида иштирок этди. 

Шунингдек, ЎФА бош котиби Аваз Максумов ФИФА соҳил футболи қўмитаси, ЎФА аёллар футболини ривожлантириш бўлими бошлиғи Юлия Панина аёллар терма жамоалари мусобақаларини ўтказиш қўмитаси йиғилишидан ўрин олган конструктив учрашувларда иштирок этишди. 

Куннинг иккинчи ярмида ФИФА томонидан расмий тадбир ташкил этилиб, 2025 йилнинг энг яхши футболчи ва мураббийи тақдирланди.

ФИФА тадбирлари доирасида қўмита аъзолари Қатарда бўлиб ўтадиган Қитъалараро кубок финал учрашуви — ПСЖ ҳамда “Фламенго” баҳси ва “Arab Cup” мусобақасининг финалидан ўрин олган Марокаш — Иордания терма жамоалари ўртасидаги учрашувни кузатиб боришади". - дейилади расмий хабарда.