Олисе шартномасини узайтиришга рози бўлмаса, сотувга қўйилади

Мюнхеннинг «Бавария» клуби етакчи ярим ҳимоячиси Майкл Олисе билан хайрлашиши мумкин. El Nacional нашрининг ёзишича, футболчига мадридлик «Реал» жиддий қизиқиш билдирмоқда.

Маълумотларга кўра, германиялик гранд ўзининг асосий вингерини сақлаб қолмоқчи. Шу билан бирга, катта миқдордаги таклиф клуб позициясига таъсир ўтказиши мумкин. Хусусан, 200 миллион евро атрофидаги сумма «Бавария»ни 24 ёшли француз футболчисини сотишга кўндириши эҳтимол қилинмоқда.

Шу билан бирга, мюнхенликлар фақат битта шарти бажарилмаса, трансферга рози бўлишлари айтилмоқда. Агар клуб Майкл Олисе билан шартномани 2032 йилгача узайтириш борасида келишувга эриша олмаса, у ҳолда унинг сотилиши варианти кўриб чиқилади. Ҳозирги амалдаги шартнома 2029 йилнинг ўрталаригача мўлжалланган.

Майкл Олисе жорий мавсум Бундеслигада тўрт ўйин ўтказди, тўртта гол урди ва яна бир бор жамоасининг голига ассистентлик қилди.