Оқ уйда "UFC" жанги ўтказилади. Дональд Трамп тасдиқлади

АҚШ президенти Дональд Трамп 2026 йили Оқ уй ҳудудида "Ultimate Fighting Championship" (UFC) жанги ўтказилишини маълум қилди. Ушбу жанг АҚШ Мустақиллик Декларацияси имзоланганлигининг 250 йиллигига бағишланади. 

Айова штатида 2026 йилда АҚШ Мустақиллик декларацияси қабул қилинганлигининг 250 йиллигига бағишланган нутқида Трамп бутун мамлакат бўйлаб ушбу санага бағишланган байрам тадбирлари ўтказилишини айтди:

"Менимча, биз "UFC" жангини ўтказамиз. Бу ерда кимдир UFC томоша қиладими? Бизда бу ҳудудда жанг ўтказиш учун жуда кўп жой бор", - деди Трамп. 

АҚШ президентининг сўзларига кўра, гап чемпионлик унвони ҳақида кетмоқда. Жараённи 25 000 томошабин бевосита томоша қила олади.  

Трамп жанг айнан қачон ўтказилиши ва унда ким иштирок этиши ҳақида маълумот бермаган. Шу билан бирга, Оқ уй матбуот котиби Каролин Левитт бу режани тасдиқлаб, президент бу масалада мутлақ жиддий гапирганини тасдиқлади. 

"UFC" президенти Дана Уайт қандай қилиб Трамп даврининг тимсолига айланди? 

Гап шундаки, Дональд яккакурашлар мухлиси саналади. Апрель ойида у "UFC" турнирида иштирок этган илк АҚШ президенти бўлди. Ушбу тадбир Майамида ўтказилганди. Шундан сўнг у июнь ойида ҳам Ньюаркдаги Пруденсиал марказида "UFC" жанггига ташриф буюрган. 

"UFC" 1993 йилда Қўшма Штатларда ташкил этилган ва айни вақтда дунёдаги энг йирик "MMA" промоушенига айланди. Йиллар давомида "UFC" бир нечта юқори даражадаги рақобатчиларни, жумладан "Japan Pride Fighting Championship", "World Fighting Alliance", "World Extreme Cagefighting" ва "Strikeforce"ни сотиб олди. 

Дана Уайт "UFC"ни 2001 йилда қабул қилган. Ўшанда компанияни бизнесменлар Лорензо ва Франк Феритта 2 миллион долларга сотиб олган. 2016 йилда "MMA" бўйича дунёдаги энг йирик акция "WME-IMG" компаниясига 4 миллиард долларга сотилган. 2023 йилда "Endeavour WWE" билан бирлашиб, "TKO Group Holdings" компаниясини ташкил этди. Шундан сўнг Уайт "UFC" президентига айланди.