Ўрунов жароҳатдан қутилдими? Бош директор сўнгги маълумотни эълон қилди

“Уфа”даги муваффақиятли ўйинларидан сўнг, ёзда “Спартак” жамоаси сафига қўшилган Остон Ўруновнинг Москва клубида ишлари кўнгилдагидек кетмаяпти. Уфаликлар сафида қисқа муддатда жамоанинг асосий фигурасига айланган ўзбекистонлик легионер “Спартак” учун том маънода ёшлик қиляпти.

19 ёшли футболчимиз асосий таркибга кириш учун Роман Зобнин, Наиль Умяров, Залимхан Бакаев, Алекс Крал сингари кучли футболчилар билан рақобатлашишига тўғри келмоқда. Қолаверса, “Челси”дан Виктор Мозес каби юқори классли ўйинчининг таркибга қўшилгани ҳам ярим ҳимоядаги шундоқ ҳам кучли рақобатни янада кучайтиради ва ўз ўзидан Остоннинг асосий таркибдан жой олишини ҳам қийинлаштиради.

gtsGnxFgDuE

Қолаверса, жисмонан бақувват ҳисобланган Остон Ўрунов қарийб бир ой жароҳатдан қийналди.  Терма жамоамизнинг октябрдаги йиғинига таклиф этилган ва Тошкентга келгач, жароҳатга йўлиққан Ўрунов мамлакатимиз бош жамоасининг Эрон ва Бирлашган Араб Амирликларига қарши ўртоқ учрашувларини ўтказиб юборди. Москвага қайтиб кетганидан кейин саломатлигини тиклаш жараёнида “Спартак”нинг премьер-лига ва Россия кубогидаги ўйинларида ҳам иштирок эта олмади.

Эндигина жароҳатидан қутилган Остон премьер-лиганинг ўтган турида “Ростов”га қарши ўтказилган учрашувнинг 80-дақиқасида майдонга тушганди. Бироқ, орадан тўрт дақиқа ўтиб, ҳамюртимиз оқсаганча майдондан чиқиб кетди. Хуллас, Ўруновнинг “Спартак”да ўзини кўрсатишига етарлича имкон бўлмаяпти. Ўзи ҳам маза қилиб тўп тепаётгани йўқ.  

“Ростов”га имконият бой берилган ўйиндан кейин “Спартак” бош директори Шамиль Газизов Остон сонининг орқа қисмидан шикастланганини, аслида аввалги жароҳатидан бутунлай тузалиб, учрашувга тўлиқ тайёр бўлганини маълум қилди.

Россия оммавий ахборот воситалари 14-тур учрашувлари олдидан Шамил Газизов билан боғланиб, “Спартак”даги вазият билан қизиқди.

- Бизда ҳаммаси жойида. Барча футболчилар саломат ва “Урал” билан бўладиган ўйинга тайёргарлик кўрмоқда. Ҳеч қандай муаммо йўқ, - деди Шамиль Газизов журналистларга.

1280_864_max (2)_3

“Спартак” бош директори таркибда жароҳатланган йўқлигига алоҳида урғу берганига қараганда, Остон Ўрунов ҳам жароҳатидан қутилган ва умумий гуруҳ билан бўлажак беллашувга тайёрланяпти.

Остон Ўрунов “Спартак” таркибида премьер-лигада жами олти марта майдонга тушиб, икки маротаба огоҳлантириш олди. Россия кубоги доирасида эса, битта учрашувда иштирок этиб, рақиб дарвозасини ишғол қилди.

Премьер-лигада 27 очко билан учинчи ўринни эгаллаб турган “Спартак” навбатдаги учрашувни 7 ноябрь куни сафарда “Урал” футболчиларига қарши ўтказади.

Мазкур беллашув Тошкент вақти билан 16:00да бошланади.

ProSports Management: Ўруновнинг агенти жуда жиддий одам, Остонга ҳамон янги таклифлар бор!

Ўруновнинг жароҳати ҳақида янги маълумот

Мураббий Ўруновнинг юлдуз даражасига етишига ишонмоқда

 

Фикрлар

Фикр қолдириш учун авторизациядан ўтинг!