Осиё болалари-2022. Ўзбекистон делегацияси Владивостокда тантанали кутиб олинди

Тошкент-Владивосток йўналишида учган "HY3707" рейсдаги самолёт 6 соату 45 дақиқа йўл босиб ўтди.

Владивостокнинг марказий аэропортида юртимиз спортчиларини Осиё болалари ўйинлари ташкилий қўмитаси аъзолари, ҳамюртларимиз учун бириктирилган волонтёрлар, Ўзбекистоннинг Владивосток шаҳридаги Бош консулхонаси, шаҳардаги ўзбекистонлик фаол ватандошлар гуруҳи нон-туз ва нозу-неъматлар билан карнай сурнай садолари остида тантанали кутиб олишди.

Спортчилар, мураббий ва ҳакамлар, мутахассислар ўйинлар дастурида белгиланган ётоқхоналари сари кузатиб қўйилди.

"Биз учун эътиборли жиҳати, спортчиларимизнинг кайфияти аъло. Барча спорт жамоаларнинг вакиллари соғ-саломат. Бугундан Владивостокда Осиё болалари спорт ўйинларида иштирок этадиган Ўзбекистон делегациясининг штаби онлайн тарзда иш бошлади. Барча йўналишларда масъуллар белгиланди. Штаб 13 кун мобайнида фаолият кўрсатади. Шунингдек, штаб қошида спортчи ёшларимизга тиббий хизмат кўрсатиш маркази, тезкор ахборот тармоғи фаолият кўрсатади", — дейди айни пайтда Осиё болалари ўйинларида иштирок этаётган Спортни ривожлантириш вазирлиги бошқарма бошлиғи Акрам Низаметдинов.

"Владивостокда 3 мингга яқин ватандошимиз истиқомат қилади. Бош консулхонамиз улар билан доимий алоқа ўрнатишга ҳаракат қилиб келмоқда. Владивостокда Осиё болалари ўйинларининг ўтказилиши, унда юртимизнинг истеъдодли спортчилари қатнашаётганлиги бизни жуда руҳлантирди. Ўйинлар жараёнининг ҳар бир мусобақасида спортчиларимизни қўллаб-қувватлаш учун ўзига хос ишқибозлар гуруҳларини ташкил этганмиз. Истагимиз, мазкур ўйинларда Ўзбекистоннинг навқирон ёшлари янги ғалабаларга эришишига баҳоли қудрат ҳисса қўшиш. Кутиб олиш маросимига Владивостокда меҳнат қилаётган 50 нафардан ошиқ ватандошларни гуллар, ноз-неъматлар билан чиқишини таъминладик. Ўйлайманки, бундан ёш спортчиларимиз хурсанд бўлди", - дейди Ўзбекистон Республикасининг Владивостокдаги Бош консули Рустам Исмоилов.

Эслатиб ўтамиз, эртага, 28 июль куни Осиё болалари спорт ўйинларига расман старт берилади. Куннинг биринчи ярмида бир қатор спорт турлари бўйича мусобақалар олди машғулотлар ташкил қилинади. Ҳакамлар, мураббийлар учун ўқув-семинарлар ўтказилади. Кечки пайти эса Владивостокдаги муҳташам Фетисов номли спорт аренада ўйинларнинг тантанали очилиш маросими ўтказилади.

Спортни ривожлантириш вазирлиги матбуот хизмати