Осиё чемпионати бошланишига салкам икки ой вақт қолди, Тимур Кападзе ҳозирги пандемия шароитида терма жамоани қанчалик тайёрлай оляпти?

Ўзбекистон миллий ва ёшлар терма жамоалари Тошкентда ўқув-машғулот йиғинларини ўтказяпти. Тимур Кападзенинг ҳозирги вазиятдан келиб чиққан ҳолда ёшлар терма жамоасидаги иши қандай кечмоқда?

-  Қийинчилик бор, йўқ эмас. Биринчидан чемпионатимизнинг мажбурий танаффусга чиққани ўз таъсирини кўрсатади, - дея гап бошлади Тимур Кападзе. - Негаки, футболчилар керакли даражада спорт формасида эмас. Иккинчидан ўртоқлик учрашувларини ташкил қилишда ҳам қийинчиликларга дуч келяпмиз. Пандемиядан аввалги йиллик режаларимиз бошқача эди. Халқаро турнирлар, КАФА мусобақаси ва яна бир қатор ўртоқлик ўйинларини ўтказишни мўлжаллаб қўйгандик. Бироқ энди ҳаммаси ўзгариб кетди. Лекин ҳамма жойда вазият шундай.

Охирги пайтларда айрим ўйинчиларимизнинг клубларида асосий таркиб билан шуғулланаётгани бизни хурсанд қиляпти. Барибир биз қийинчиликларга қарамай, ҳаракатдамиз, изланишдамиз. Бунгача бир нечта йиғин ўтказдик ва футболчиларнинг имкониятларини кўриб боряпман. Лекин ўзим хоҳлаган барча ўйинчиларни йиға олмаяпман. Клубларида асосий таркибда ўйнаётган болаларга ҳозирча тегмаяпман. Уларнинг ўйин амалиётига эга бўлаётгани ўзлари учун ҳам, биз учун ҳам фойдали.

Мана, жамоамиз билан йиғин ўтказиш имконини топа олдик. Чемпионатимиз вақтинча тўхтатиб қўйилгани боис клублар ҳам шуғулланмаяпти. Йиғинга келган ўйинчилар билан гаплашсам, улар ҳам машғулот ўтказишмаётганини айтяпти. Мен эса, уларни спорт формасида ушлаб туришим керак. Айниқса, жисмоний томондан яхшироқ тайёрлашга ҳаракат қиляпмиз. Вадим Абрамов билан гаплашдик ва миллий терма жамоа билан иккита ўртоқлик учрашувини ўтказишга келишиб олдик. Бу ўйинларда йигитларимизнинг ўзига ишончи ортади ва камчиликларимизни ҳам кўриб оламиз. Ушбу йиғинимиздан кейин Суперлига яна давом эттирилади ва август охиригача ўйинлар ўтказилади. Сентябрдан эса яна тайёргарликни давом эттирамиз.

Ёшлар терма жамоаси август ва сентябрда йиғин ташкил этгач, октябрда Осиё чемпионатига киришиб кетади. Асосий таркиб ўзаги аниқми ёки ҳали танлов кетяптими?

-  Деярли барчани биламан. 90 фоизга асосий таркибни аниқлаштириб олганман. Фақат бир-иккита позицияларга яна янги йигитларни чақириб синаб кўряпман. Чемпионат давом эттирилмаётгани сабабли кузатувдаги ўйинчиларни кўра олмаяпмиз. Бу масалада кўп муаммолар туғилаётгани рост. Барибир имкони қадар таркибга янги футболчиларни таклиф қилиб, уларни кўриб чиқяпман. Келажак учун ҳам номзодларни кузатяпмиз. Октябрь ойидаги мусобақа ҳам, ундан кейинги турнирлар ҳам муҳим. Агар Осиё чемпионатида чемпион бўлсак, келаси йили жаҳон чемпионатида қатнашишимиз керак. Сўнг Олимпиада саралаши турибди.

Шу пайтгача 80 нафар ўйинчини кўриб чиқдим. Ўтган йилнинг декабрь ойидан йиғин бошладик. Кейин январь ва февралда шуғулландик. Хуллас, ҳар йиғинимизда янги номларни синовдан ўтказиб келяпмиз. Кимдир кучсизроқ бўлиши мумкин, кимдир эса бизга тўғри келяпти. Номзодлар Осиё чемпионатида иштирок эта олмаса ҳам уларни кузатишда давом этамиз. Ахир боя айтганимдек, олдинда ўйинлар кўп. Барибир ҳар бирига имконият тақдим этилади.

Ҳозир вазият жуда хавотирли. Октябрь-ноябрь ойларига бориб пандемия яна кучайиб кетиш эҳтимоли бор. Кападзеда “б” режа тайёрми?

- Менимча, октябрь ойидаги Осиё чемпионати режа бўйича ўтказилиши керак. Аммо кейинчалик нима бўлишини ҳеч ким билмайди. Ҳар қандай вазиятда ҳам режа бўйича тайёргарлик кўраверамиз. Мусобақадан аввал якуний таркиб ОФКга тақдим этилади. Футболчилар “заявка”дан ўтганидан кейин кимдадир коронавирус аниқланса, унинг ўрнига бошқа футболчини таркибга қўша оламизми ёки йўқми, буни ҳозирча билмайман. Чунки бундай вазиятда ОФКнинг қарори қандай бўлишидан бехабарман. Ҳеч ким бундан кафолатланмаган. Бутун дунёда пандемия яна такрорланяпти. Миллий терма жамоамизда ҳам covid юқтириб олганлар чиқди, дейишяпти. Лекин йигитлар билан гаплашганда улар ўзларини яхши ҳис қилишяпти. Менимча, уларни даволаш қийин кечмайди. Албатта, биз ҳам ҳар бир йиғиндан олдин футболчиларимиз билан тест топширяпмиз. Йиғин якунида ҳам яна бир бор тест топшириб, кейин футболчиларни клубларига қўйиб юборамиз. Мусобақа яқинлашгани сари жамоамиз билан битта жойда тўпланиб, ҳеч кимни ташқарига чиқармасдан тайёргарликни давом эттирамиз. Осиё чемпионати катта мусобақа. ОФК томонидан ҳам уни ўтказиш бўйича кўрсатмалар бериб боряпти. Юртимизга келадиган терма жамоалар ҳам тест топшириб кейин келади. Демоқчиманки, ҳаммасининг эхтиёткорлиги кўрилади.

Жасур Жалолиддинов ҳақида нима дейди?

- Жасурнинг имконияти юқори. Уни бежизга олишгани йўқ. Анчадан бери пухта кузатиб келишган. “Бунёдкор”даги ва терма жамоадаги ўйинларини кўришган. Шу ёшда Суперлигада ўйнаб ўзини эркин ҳис қилиши, “Бунёдкор”да етакчилардан бирига айлангани ҳам катта гап. “Локомотив”га кетгани фақат фойда. У ерда мутахассислар ҳам кучлироқ. Унинг ўсишига янада ёрдам бўлади. Ўйинчиларимиз кучлироқ клубларга бориши футболимизга фойдали. Легионер бўлиб ўйнагандан кейин истаса-истамаса икки баробар кўпроқ ишлайди. Россияда ундан кўп нарса кутишяпти. Ўйлайманки, Жасур ўз устида янада кўпроқ ишлайди. Осиё чемпионатига уни қўйиб юбориши борасида муаммо бўлмайди. Шартнома тузилаётганда бу масала келишилган. Сентябрь охирларида терма жамоамиз ихтиёрига қўшилади.

Рақибларни ўрганиш мураббийларга қўшимча қийинчиликлар туғдирмаяптими?

-  Рақибларимизнинг Осиё чемпионати саралаш баҳсларидаги ўйинларини топдик. Шунга қараб, уларнинг ўйинларини кўрдим. Лекин пандемия даврида масалан Эрон йиғилганми-йўқми, ҳозирча бу борада маълумотга эга эмасмиз. Лекин яқинда мураббий алмашганидан хабарим бор, демак, машғулотларга киришишган бўлса керак. Менимча, Осиё чемпионатига келадиган жамоалар барибир тайёргарлик кўряпти. Кимдадир вақт кўпроқ, кимдадир камроқ бўлиши мумкин. Жамоалар ўзидаги ички вазиятдан келиб чиқиб шуғулланяпти, менимча. Аммо ҳеч ким халқаро ўртоқлик ўйинларини ўтказа олмайди. Барча термалар уй шароитида, ўзининг мамлакатида тайёргарлик кўряпти. Бизга ҳам халқаро даражадаги ўйинлар керак. Сентябрнинг охирлари, октябрнинг бошларида терма жамоалар юртимизга келишни бошлайди. Эшитишимча, Малайзия терма жамоаси бизга мусобақадан олдин ўртоқлик учрашуви ўтказиш бўйича таклиф билан чиққан. Шу сабабли турнирдан олдин ўртоқлик ўйинлари ўтказиш ниятимиз бор. Энг асосийси, ҳаммага соғлик тилайман. Бу бир кунда йўқолиб кетадиган нарса эмас. Биз  вазиятдан келиб чиқиб имкони борича тайёргарлик кўрамиз. Уйимизда ўтадиган Осиё чемпионатида барчани хурсанд қилишга ҳаракат қиламиз.