Осиё ўйинлари чемпиони 3 йилга дисквалификация қилинди!

Каноэда эшкак эшиш бўйича Ўзбекистон терма жамоаси аъзоси Шоҳмурод Холмуродовдан Ханчжоу-2022 Осиё ўйинлари даврида олинган допинг синамасида спортда тақиқланган “Кломифен” моддаси борлиги аниқланди. Бу ҳақда Ўзбекистон Миллий Антидопинг агентлиги маълум қилди.

"Шоҳмуроддан Холмуродов Бутунжаҳон антидопинг кодексининг 2.1 қоидаси (Тақиқланган модда ёки унинг метаболитлари ва маркерлари спотрчи анализида мавжудлиги)ни бузганлиги сабабли Бутунжаҳон антидопинг кодексининг 10.2.1 бандига асосан 3 йил муддатга дисквалификация қилинди", - дейилади расмий хабарда.

Эслатиб ўтамиз, Шоҳмуроддан Холмуродовдан Ханчжоу-2022 Осиё ўйинларининг 1000 метр масофага ўтказилган баҳсида Нурислом Тўхтасин билан жуфтликда олтин медални қўлга киритган.

"Маълумот учун айтиб ўтмоқчимиз, дисквалификация жазо муддатини ўтаётган шахс (спортчи, мураббий в.х.к) дисквалификация муддати тугаганга қадар халқаро ва миллий тоифадаги мусобақалар ва ўқув-машғулот йиғинларида иштирок этиши тақиқланади. Агар юқоридаги талаблар бажарилмаган тақдирда ушбу шахсга умрбод дисквалификация муддати қўлланилиши мумкин. Шунингдек, кодексда спорт федерацияси ёки ассоциациясига нисбатан ҳам жазо чораси қўллаш мумкинлиги белгиланган", - дея қўшимча қилинади Агентлик баёнотида.