От спорти. Учкураш йўналиши бўйича мамлакат кубоги учун баҳслар бошланди

Бугун пойтахтимиздаги “Universal Horses Stables” от спорти клубида учкураш бўйича Ўзбекистон кубоги баҳсларига старт берилди. Бу ҳақда Ўзбекистон Миллий Олимпия қўмитаси матбуот хизмати хабар тарқатмоқда.

Манбага кўра,уч кун давом этадиган мусобақада чавандозлар от йўрттириш, кросс ва конкур дастурларида бор маҳоратларини намойиш этишади. Қоидага кўра, спортчи барча йўналишларда фақат битта от билан иштирок этиши мумкин.

Олимпия ўйинлари дастуридан ўрин олган мазкур йўналиш мамлакатимизда ҳам тобора оммалашиб бормоқда. Ушбу мусобақа келаси йил Хитойнинг Ханчжоу шаҳрида бўлиб ўтадиган Осиё ўйинларига тайёргарлик йўлида терма жамоа таркибини шакллантириб олиш учун муҳим стартлардан бири ҳисобланади.