Отабек Шукуров: "Буни ҳазм қилиш қийин"

SPORTS.uz "Дангал" лойиҳаси орқали мухлисларимизга ҳақиқатларни тақдим этишда давом этади. Бугун БААнинг "Шаржа" жамоаси аъзоси Отабек Шукуров билан бўлган суҳбатнинг ёзма версиясини эътиборингизга ҳавола этамиз. Интервьюни тўлиқ томоша қилишни истаган инсонлар учун матн сўнгида ҳавола қолдирилади.

Бироз орқароқдан бошлаймиз. Абрамов мураббийлигидаги терма жамоа Саудиядан аламли мағлубият қабул қилиб олгач, кийиниш хонасида энг кўп йиғлаган сиз бўлдингиз. Бу нима билан боғлиқ?

- Буни ҳамма ҳар хил қабул қилган бўлиши мумкин, менга жуда қаттиқ таъсир қилганди. Фаолиятимдаги иккинчи жаҳон чемпионатини ўтказиб юборяпман. Буни ҳазм қилиш қийин. Ҳали ёшман, дейишга ҳаққим йўқ. Бу кичик нарса эмас. Бутун Ўзбекистон халқи сингари биз ҳам ёшлигимизда ЖЧдан қуруқ қолганимизда кўз ёш тўкканмиз.

Бутун бошли ўзбек футболини мундиал йўлланмаси учун қуриш қай даражада тўғри?

- Фақат терма жамоадан буни талаб қилиш керак эмас. Айниқса, ЖЧ саралаши чоғида босимни оширишдан наф йўқ. Кўпроқ ёшларга эътибор қаратиш лозим. Бугунданоқ ҳаракатни бошлаш керак. Тизим тўғри йўлга қўйилса, худди Жанубий Корея, Япония, Эрон, Австралия сингари барча катта мусобақаларга йўл олиш мумкин. Уларда асосий таркиб ўйнмаса ҳам бошқа 11 та футболчи бемалол бўшлиқни тўлдириши мумкин. Бизда биргина футболчининг йўқлиги дарров сезилади. Академия ва мактабларга кўпроқ эътибор бериш шарт. Ана шунда, 8 ёки 12 йилдан сўнг эътибор берилган ёшлар кучли рақобатда етишгани боис, бизни жаҳон чемпионатига олиб чиқиши мумкин. Биз ҳам бу нарсани нормал қабул қилишни бошлаймиз. Барчаси болалар футболига боғлиқ. Футболчи сифатида саралаш ўйинларида буни ҳис қиламиз. Балки, шунинг учун ҳам йиғлармиз.

Сиз 10 йил аввал ўсмирлар терма жамоамиз сардори сифатида Осиё чемпионлигини қўлга киритгансиз. Ўшанда сизни келажакда Европада ҳаракат қилишингиз тахмин қилинган эди. Аммо ҳозир "Шаржа"дасиз...

- Ҳеч нарсадан нолимайман. Ҳамма нарса учун Яратганга шукр қиламан. Агар ўзимга боғлиқ нарса бўлса, доимо ишимга профессионал ёндашганман. Тўғри, камчилик ҳаммада бор. Нима бўлган тақдирда ҳам қилган ишларимни хато, деб ўйламайман. Худо менга шуни насиб қилибди. Саволингизни тушундим. "Шаржа"га мажбуран келганман. Оёғим сингани боис Германияга кета олмадим. Ҳозиргача БААда футбол ўйнаганимдан кўнглим тўлмайди. Шунинг учун трансфер ойнаси очилиши билан клуб раҳбарлари билан талашиб тураман. Кетмоқчи эканлигимни айтаман, аммо бу фойда берганича йўқ. Кучли чемпионатда тўп тепишга кучим ҳам, вақтим ҳам етарли. Шу кунгача ҳеч нарса ўз хоҳишим билан бўлгани йўқ.

Ўзбекистонда футбол "тирик"ми ёки анча оғир аҳволдами?

- Биринчи навбатда, мухлисларни тўғри тушунаман, футбол улар билан. Сиз ватан шаънини ҳимоя қиласиз. Клуб билан терма жамоанинг фарқи жуда катта. Уларнинг танқидлари ва кескин фикрларини тўғри тушунаман. Улар сингари мен ҳам футболимиз ривожи учун қўлимдан келганини қилишга тайёрман. Саволингизга келадиган бўлсак, барчаси ЖЧ саралаши билан боғлиқ. Финал босқичига чиқа олмаганимиз учун эътибор ва муносабат шундай бўлиши табиий. Миржалол ака Қосимовнинг бир гап бор: "Қарсак ҳеч қачон бир қўлдан чиқмайди!" Биз чиқа олмадик, демак эътибор ҳам шунга яраша бўлмоқда, барчаси бир-бирига боғлиқ. Ҳозир янги мураббийлар келди. Футболга эътибор ошган. Одил ака Аҳмедов федерацияда ишлаяпти. Ҳозир биздан ўйин сўралмаяпти. Мақсадимиз ЖЧга тайёрланиш. Мана шундай қўйиб бериш керак. Энг керакли паллада ўзгаришлар бўлмаслиги шарт. Бу жамоавий ўйин, бир кишига қараб қолмаган.

Бугунги ва аввалги футбол авлодларини солиштирсак, ҳозиргиси бироз кучсизроқдек туюлади. Бу борада фикрингиз қандай?

- Бу ҳам психология билан боғлиқ. Агар саралашнинг ҳал қилувчи босқичига йўл олиб, ЖЧ учун курашганимизда барчаси бошқача бўлиши мумкин эди. Сиздан тортиб, қолган мухлисларгача, ҳатто, ўзим ҳам. 3-босқичда энг кучлилар билан кураш олиб бораётган бўлар эдик. Очколарни санаб, бошқа ўйинларни кузатиб, бир жамоага айланиш имкони қўлдан кетди. Тасаввур қилиб кўринг! Бир ё икки ўйинда мундиал йўлланмаси кўрина бошланса, икки ҳисса куч билан ҳаракат қилишингиз аниқ. Футболчиларгина эмас, мураббийлар ҳам ўсади. Барчасини бундай чигал бўлиб кетишига ўзимиз сабабчи. Футболда ҳозир мухлислар бизга пасайиш бордек назар ташламоқда. Сўнгги йиғинлардаги ёшлар билан шу ҳақида гаплашдик. Барчасини аввалги даражага олиб чиқиш ҳам ўз қўлимизда.

Интервьюнинг тўлиқ версиясини томоша қилишингиз мумкин.