Оярсабаль Испаниянинг барча даврлардаги рекордини ўрнатди
“Реал Сосьедад” клубидан Испания терма жамоасига жалб қилинган ҳужумчи Микель Оярсабаль халқаро миқёсда ажойиб натижалар қайд этмоқда.
Испания терма жамоаси 2026 йилги жаҳон чемпионатининг Европа саралаш турнири охириги турида ўз мухлислари кўз ўнгида Туркия билан 2:2 ҳисобида дуранг ўйнади.
28 ёшли футболчи 62-дақиқада гол уриб, Испания терма жамоасини аламли мағлубиятдан қутқариб қолди. Бу гол Оярсабаль номини футбол тарихига муҳрлади.
MisterChip маркази маълумотига кўра, Микель Оярсабаль Испания терма жамоаси тарихида кетма-кет тўққизта учрашувда самарали ҳаракат қилиб, гол урган ёки голли узатмани амалга оширган биринчи футболчи бўлди.
Туркия билан дурангдан сўнг, Луис де ла Фуэнте шогирдлари ўз саралаш гуруҳида бешта ғалаба ва битта дуранг билан жаҳон чемпионатига йўлланмани нақд қилди.
Фикрлар