Ўзбек бокс ҳамда ММА олами вакилларининг кумирлари ким бўлган? ( 1-қисм)

Ҳар бир спортчини ёшликда ўзи ҳавас қилган ва у каби бўлишга интилган қаҳрамони бўлганлиги аниқ. Албатта, ҳозирги кунда ўзбек бокс ҳамда ММА оламининг машҳур вакиллари ҳам ёш спортчилар учун намуна эканлигига шубҳа йўқ. Ваҳоланки, уларнинг ҳам ўз вақтида ўзига хос кумирлари мавжуд бўлган. Биз бугун ушбу мавзуга эътибор қаратдик ва уларнинг кумирлари ким бўлганлиги билан қизиқдик.

Ҳасанбой Дўсматов-боксчи

- Ёшлигимдан Муҳаммадқодир Абдуллаевга ҳавас қилганман ва у каби боксчи бўлишга ҳаракат қилганман. Шунингдек, профессионал бокс оламида филиппинлик Мэнни Пакьяонинг жангларини севиб томоша қилардим. Қисқа қилиб айтганда, шу икки боксчи кумирим бўлганди.

Азизбек Абдуғофуров- боксчи

- Кумиримиз профессионал бокс оламининг машҳур вакили Флойд Мейвезер бўлган. У иштирокидаги ҳар бир жангни томоша қилиб борганман. Мейвезернинг ҳаракатлари, техникасига қойил қолардим.

Шоҳасан Мирзаматов- ММА жангчиси

- Ҳар битта спортчини ўзининг ҳавас қилган инсони бўлади. Менда ҳам бундай инсон бор эди. Афсуски, энди у орамизда йўқ. Мурод Хонтўраевни ҳар томонлама ҳурмат қилардим,ҳавас қилардим. Ажойиб спортчи билан бир қаторда яхши инсон  эди. Мурод акамни Аллоҳ раҳматига олсин!

Шаҳобиддин Зоиров- боксчи

- Ёшликда ҳамюртимиз, бухоролик Аббос Атоевга ҳавас қилганман. Унинг жанг олиб бориш услубларига қизиққанман. Яқин акамиз бўлади,шунинг учун ундан кўп маслаҳатлар олиб тураман. У ўз вақтида кўплаб ютуқларни қўлга киритган.

Ҳумоюн Ибрагимов- ММА жангчиси

- ММАга қизиқишим уйғонишидан аввал таэквондо, каратэ, бокс, кикбоксинг,  юнон-рум кураши ва житкун-до билан шуғулланганман. Лекин булар мен хоҳлаётган спорт тури бўлиб чиқмади! ММАга кириб келишимга акам Элшод Кабиров сабабчи бўлган, десам ҳам янглишмайман. Сабаби, у UFC дискларини сотиб олган ва биз биргаликда жангларни томоша қилардик. Ўша вақт Танк Эбботни жангларини кўрганман ва қизиқиш уйғонган. Кейинчалик Pride промоушенида жанг қилган Фёдор Емельяненко, Мирко Крокоп жангларини томоша қила бошлаганман. Кумирингиз ким деган саволга албатта, Фёдор Емельяненко дея жавоб қиламан. Бироқ, Фёдорнинг жанг услублари меникидан узоқда бўлганлиги учун кўпроқ  Мирко Крокопни кузатардим.

Иқболжон Холдоров- боксчи

- Ёшлигимдан бокс қироли Муҳаммад Али ҳамда Рой Жонснинг фаолиятига қизиққанман. Уларнинг бетакрор ҳаракатларига қойил қолардим ва улар каби бўлишга ҳаракат қилганман.

Азамат Нуфтиллаев- ММА жангчиси

- Фёдор Емельяненкога ҳавас қилганман. У ўз вақтида барча кучли рақибларни мағлуб эта олган ва узоқ вақт чемпионлик титулини ҳимоя қилган. Қолаверса, унинг жанглари қизиқарли эди. 

Авлиёхон Ҳамидов- ММА жангчиси

- Кўпчилик биз қатори бўлган ММА жангчиларининг кумири шубҳасиз, Фёдор Емельяненко бўлган, деб айтсам янглишмаган бўламан. Унинг октагондаги ҳаракатлари шунчаки фантастика бўлган. Бу саволингизга мен ҳам "Сўнгги Император"ни айтган бўлардим.

Бобоусмон Ботуров- боксчи

- Менга кўпроқ урушқоқ боксчилар ёққан ва ҳавас қилардим.Кумирга келадиган бўлсак, ўз вақтида професионал бок оламида  барчанинг ёқимтойига айланган, Артуро Гатти ҳамда Оскар Де Ла Хояни айтган бўлардим.

Дадахон Ҳасанов- ММА жангчиси, рефери

- ММА оламига кириб келишимнинг асосий сабабчиларидан бири Фёдор Емельяненкодир. Айнан Фёдорнинг жангларини томоша қилиб, бу спорт турига қизиқишим ошган. 

Аълохон Абдуллаев- боксчи 

- Ёшлигимда Константин Цзюга ҳавас қилганман. Унинг рингдаги ҳаракатлари, ўзига хос услуби жуда ёқарди. Кумирим айнан шу боксчи бўлган. Шунинг учун унинг ўғли Тим Цзюни жангларини ҳам кўриб бораман. Тим куни кеча ажойиб жанг ўтказди ва навбатдаги ғалабасига эришди.

Диёр Муталибов- ММА жангчиси

- Биринчи рақамли кумирим Ҳабиб Нурмагомедов ҳисобланади. У ҳар томонлама, жангчи ва инсон сифатида ҳам ёшларга намуна бўладиган шахс.

Мужибулло Турсунов- боксчи

- Ёшлигимдан биринчи Олимпида чемпиони Муҳаммадқодир Абдуллаевга ҳавас қилганмиз.Жангларини томоша қилиб катта бўлдик ва у каби рингда ҳаракат қилишга интиляпмиз.

Лазизбек Муллажонов- боксчи

- Кумирим Рой Жонс ҳамда Александр Усик. Менимча Рой Жонснинг ҳаракатлари, техникаси барчага мақул тушса керак. Усик ҳам ўзгача боксчи. Уларнинг жангларини томоша қилиб, фақат завқ оласиз.

Ҳумоюддин Мухторов-ММА жангчиси

- Ёшлигимдан Фёдор Емельяненкога ҳавас қилганман. Ўзим ҳам ҳозир оғир вазн тоифасида фаолият олиб бормоқдаман ва унинг жангларини кузатиб, жуда кўп нарса ўрганишга ҳаракат қиламан. У шунчаки тирик афсона!

Асадхўжа Мўйдинхўжаев- боксчи

- Кумир ҳақида гап кетганда ўзимизнинг Фазлиддин Ғоибназаровни айтишим мумкин. Бевосита унинг жангларини томоша қилганмиз ва ҳаракатлари менга жуда маъқул келади. 

                                                                 Абдумалик Халоков- боксчи

- Ёшлигимдан жуда кўп боксчиларга ҳавас қилганман. Бироқ, улар орасида барибир Рой Жонсга меҳрим бўлакча бўлган. Шунинг учун бу саволга Рой Жонс деб жавоб бераман.