Ўзбек боксчиси IBF интерконтинентал чемпионлик камарига жанг қилади. Рақиб Россиянинг энг кучли боксчиларидан...

6 сентябрь куни Россиянинг Чельябинск шаҳрида RCC томонидан навбатдаги профессионал бокс оқшоми ташкил этилади. Мазкур бокс  оқшомида 4 нафар ўзбекистонлик боксчи рингга кўтарилиши кўзда тутилган. Шумладан, муҳаммад Шехов, Жаҳонгир Расулов, Баҳромжон Фозилов ҳамда Улуғбек Собиров навбатдаги жангларини ўтказишади. 
 Айниқса, Улуғбек Собиров (14-3, 8 КО) анчагина жиддий рақиб Павел Силягин (14-0-1,7 КО) билан IBF интерконтинентал чемпионлик камари учун жанг қилади. Мазкур қарама-қаршилик супер ўрта вазн 76,2 кг вазн тоифасида бўлиб ўтади. Собиров бунга қадар ўрта вазн 72,6 кгда ўз жангларини ўтказиб келганди. 
Биз ушбу рақиб танланиши ва вазн кўтариши борасида мураббий Сардор Раззоқов билан боғландик ва унинг фикрлари билан қизиқдик. 

- Албатта, Павел Силягин жуда яхши даражадаги рақиб ҳисобланади. Лекин Улуғбекда ҳам ундан қолишмайдиган салоҳият мавжуд. Тўғриси, Улуғбекка рақиб топишда бироз муаммолар юзага келяпти. Ваҳоланки, у рейтингда 100 таликка киради холос. Энди, вазнни кўтаришига келадиган бўлсак, бу биз учун катта имконият бўлади. Агар, жангда ғалаба қозонсак, катта имкониятлар эшиги очилиши тайин. Қолаверса, Улуғбекнинг габарити, жисмоний ҳолати ҳам бу вазнга тўғри келади. Ўйлайманки, барчаси яхши кўриниш олади.