"O‘zbek klassiko"sida "dahshat"li to‘qnashuv yoxud "Neftchi" o‘z uyida begonami?

Superliganing bu turida “O‘zbek klassikosi” borligini yaxshi bilsangiz kerak. Farg‘onaning “Neftchi” jamoasi amaldagi chempion – “Paxtakor”ni qabul qiladi. Bu jiddiy o‘yin. Bu safargi to‘qnashuvda keskinlik yanada yuqori darajaga chiqishi kutilmoqda.

Mazkur uchrashuv nihoyat Farg‘onadagi “Istiqlol” stadionida o‘tishi kutilayotgandi. Biroq yana “Turon”ning maydoni – Yaypandagi o‘yingohda o‘tkaziladigan bo‘ldi. Bunga sabab “Istiqlol” stadionining maysasi hali to‘liq tayyor emasligi ko‘rsatildi. Ungacha “Neftchi” vakillari o‘z uyida ochilish o‘yinini o‘tkazishga astoydil tayyorgarlik ko‘rayotgandilar. Biroq yuqoridagi sabab tufayli “Neftchi” jamoasi yana o‘z maydonidan foydalana olmay turadigan bo‘ldi. Bu haqida O‘zPFL bosh direktori Diyor Imomxo‘jaev ham o‘zining telegramdagi rasmiy sahifasi orqali bu masalaga to‘xtalib, jumladan shunday yozdi: “Neftchi” muxlislari “Istiqlol” stadioni masalasida “Istiqlol” stadioni xodimlarini savolga tutishlari to‘g‘riroq bo‘ladi. Biz uchrashuvni Farg‘onada o‘tkazishni istadik, hamma istadi. Ammo chim istamayotgan bo‘lsa, bunga biz javobgar emasmiz”.

Shu fikrning o‘ziyoq ko‘p masalaga oydinlik kiritib turibdi. Shunday qilib, “Neftchi” o‘z maydonida o‘ynashidan umid qilgandi-yu, biroq yana birovning maydonida nominal mezbon sifatida to‘p suradigan bo‘ldi. Ya’ni, bunday vaziyatda o‘z uyida “begona” degan iborani ham qo‘llasak yarashaveradi.

Nima bo‘lganda ham farg‘onaliklar “Turon” stadionidan yana mezbon sifatida foydalanib turishadi va tayyorgarlikni shunga yarasha olib bormoqdalar. O‘tgan turda “Neftchi” vodiy derbisida o‘sha “Turon” stadionida “Qo‘qon-1912” bilan qanday o‘yin ko‘rsatganini ko‘rgandirsiz-a?! Anchadan beri bunday qiziqarli o‘yinni ko‘rmagandik. Hisob hammasini aytib turibdi – 3:3. Bu safar farg‘onaliklar yanada jiddiy uchrashuvda ishtirok etishadi. “Neftchi”ning yangi bosh murabbiyi Vitaliy Levchenkodan faqat ijobiy natija kutilyapti. Vaqt esa kutib turmaydi. Uning debyuti jangovar durang bilan yakunlangan bo‘lsa, bu safar uning jamoasidan faqat g‘alaba talab qilinishi tabiiy. Buning ustiga Levchenko hozircha yangi klubida ilk g‘alabasini qo‘lga kiritgani yo‘q. Jamoaning hozirgi mavqei o‘ziga yarashmayotgani sababli rahbariyat tezroq darajasini yaxshilashini xohlashyapti. Levchenko shuning uchun ham taklif qilingan. Balki murabbiyning chempionga qarshi o‘ylab qo‘ygan rejasi ham bordir. Biroq “Paxtakor” uchun ham bu o‘yinning ahamiyati juda katta. Maksim Shatskix bosh murabbiy sifatida ikkita o‘yin o‘tkazib bir g‘alaba va bir durang qayd etdi. Uchinchi o‘yini vodiy derbisiga to‘g‘ri kelmoqda. Ikkala klubda ham yangi murabbiylar ish boshlashgan va imkoni qadar tezroq natija ko‘rsatish ilinjida yurishibdi. Mavqeini biroz tushirgani aytilayotgan “Paxtakor” Shatskix boshchiligida yana chempionlik uchun barqaror ravishda kurasha oladimi? Bunga javobni chempionat oxirida olsak kerak. Hozirda murabbiy jamoasining o‘yinidagi kamchiliklarni bartaraf etish ustida ishlayapti. Ikkita uchrashuvda klub o‘z darvozasidan 4 ta to‘p olib chiqdi. Chempiondek jamoa uchun bu ko‘rsatkich salbiy. Shuning uchun Maksim Aleksandrovich mudofaa chizig‘i ustida bosh qotirayotgan bo‘lsa ajab emas. Buning ustiga “So‘g‘diyona”ga qarshi bahsda Odil Hamrobekov qizil kartochka olib maydonni erta tark etgani sababli bu safar jamoasiga yordam bera olmaydi. Bu esa “Paxtakor” uchun jiddiy yo‘qotish. “Neftchi”da esa Abbos G‘ulomov maydonga tusha olmaydi. 14-turda “Qo‘qon-1912”ga qarshi uchrashuvda maydondan chetlatilgani bunga sabab.

Bu eski tanishlar to‘qnashuvi boy tarixga ega. Chempionatimizda bir-biri bilan eng ko‘p to‘qnash kelgan juftliklardan biri sanaladi. Shu kungacha chempionat doirasida 55 marta maydonda kuch sinashishgan. “Neftchi” jamoasi chempion ustidan 20 bor g‘olib chiqqan bo‘lsa, “Paxtakor” azaliy raqibi ustidan 26 ta bahsda ustun kelgan. Yana 9 ta qarama-qarshilikda kuchlar teng kelib qolgan. “Neftchi” 67 bor gol urgan, “Paxtakor” 92 marta raqib darvozasini ishg‘ol qilgan va 100 lik marraga yaqinlashib qoldi. Farg‘onaliklar so‘nggi bor kuchli raqibi ustidan 2016 yilgi mavsumda g‘olib chiqqan bo‘lib, o‘shanda “Neftchi” o‘z maydonida 1:0 hisobida yutuqqa erishgan. Qizig‘i, o‘sha yilgi mavsumning birinchi davrasida Toshkentdagi bahsda ham farg‘onaliklarning qo‘li baland kelgan – 1:2. Joriy mavsumning birinchi davrasida “Paxtakor” Toshkentda Dragan Cheranning yagona goli evaziga “Neftchi”ni mag‘lub etgan. Bu galgi bellashuvdan ko‘p narsa kutilyapti. Ayniqsa, tomoshabop tarzda o‘tishining ehtimoli baland. Bunga yuqorida bir qator faktorlarni misol keltirdik.