O‘zbek-qozoq bokschilari o‘rtasidagi printsipial janglar esingizdami? O‘zaro "hisob-kitobimiz" qanday?

Kichik jahon chempionatiga qiyos qilinuvchi "Strandja" turniriga ham oz vaqt qoldi. Garchi, ushbu turnirga Kuba va umuman Yevropa hamda Osiyo qit’asining boksi rivojlangan mamlakatlari eng kuchli tarkibi bilan tashrif buyursa-da, baribir asosiy raqobatchi Qozog’iston terma jamoasi bo’ladi, desak yanglishmagan bo’lamiz.

Ma’lumki, “Markaziy Osiyo derbisi” deya nom olgan, o’zbek-qozoq bokschilari o’rtasidagi har qanday qarama-qarshilik juda qiziqarli va shiddatli o’tadi. Mana shunday sog’lom raqobat bir necha yillardan buyon davom etadi va bu omil har ikki mamlakat boksini jahonda yetakchi bo’lishiga olib keldi.

Biz bu borada bejizga so’z yuritmadik. 

Ha, qo’shnilarimiz bilan istalgan to’qnashuv muxlislarda yorqin taassurot qoldiradi. Lekin ular orasida shunday prinsipial qarama-qarshiliklar borki, ular nafaqat ikki yurt, balki butun boks olamida qiziqish uyg’otgan, desak mubolag’a bo’lmaydi. 

Demak, ularni yodga olamiz... 

Rustam Saidov - Muxtarxon Dildabekov: Ular ikki bor to’qnash kelishgan va hisob 1:1 ko’rinish olgan. 

Elshod Rasulov - Adilbek Niyazimbetov: Ikkisi 4 marotaba duch kelishgan va umumiy hisob 2:2 ko’rinish olgan. 

Hasanboy Do’smatov - Birjan Jakipov: Bu qarama-qarshilik ham juda qiziqarli bo’lgandi. Yakuniy hisob 1:1 bo’lgan.

Hasanboy Do’smatov - Saken Bibossinov: So’nggi yillarda ular orasidagi har qanday bosqichdagi jang, finaldan oldingi final maqomiga ko’tarila olgan edi. Ikkisi 4 marotaba to’qnash kelishgan. Umumiy hisob 3:1 Do’smatov foydasiga. 

Bahodir Jalolov - Kamshibek Ko’nkaboev: Ular jami 10 bora to’qnash kelishgan va 7:3 hisobidagi ustunlik vakilimiz tarafida. 

Xullas, Markaziy Osiyo derbisidagi mana shunday qiziqarli bahslar hali uzoq davom etadi. Zero, bu ikki yurt bokschilari jahon boks olamidagi yetakchilikda davom etadi, degan fikrdamiz. 

Manba: O’zbekiston boks federatsiyasi