Ўзбекистон чемпиони бўлган рэпер қиз ёхуд "Top Rank" қизиқишига сабаб бўлган вакиламиз ҳақида эшитганмисиз?

Юртимизда аёллар бокси ҳам аста-секин ривожланиб бормоқда. Бунга ички чемпионатларда қизларимиз томонидан тақдим этилаётган муросасиз жанглар ва жиддий рақобат мисол бўла олади. Куни кеча якунланган жорий йилги мамлакат чемпионатида ҳам қизлар ўртасидаги жанглар яхши таассурот қолдирди. Жумладан, 54 кг вазн тоифасида Андижон вилояти шарафини ҳимоя қилган Азиза Ёқубова барча рақибаларини  мағлуб этиб, Ўзбекистон чемпионлигини қўлга киритди.

Биз ўзига хос имиджга эга бўлган, истеъдодли боксчи қизимизни суҳбатга тортдик.

- Чемпионлик муборак!

- Ташаккур!

- Фаолиятингиздаги нечанчи чемпионлик?

- Олтинчи.

- Қайси вазнларда ушбу унвонларни қўлга киритгансиз?

- 51, 54 ва 57 кг.

- Аввал, Жиззах вилояти шарафини ҳимоя қилардингиз. Бу сафар эса Андижон...?

- Бунинг ўзига яраша тарихи бор. Мен 1994 йил 3 августда Жиззах шаҳрида таваллуд топганман. 10 ёшимдан буён бокс билан шуғулланиб келаман. Тоғаларим спортчи бўлганлиги сабабли, боксга қизиқишим кучли ва ушбу спорт турини танлаганман. Рио Олимпиадасида боксчиларимизнинг кўрсатган натижаларидан илҳомланиб, янада ўсиш учун устозим Зиёйиддин Тайғонбоевнинг қўл остида шуғулланиш мақсадида Андижонга келганман. Маълумки, бу вилоят бокс мактаби бутун жаҳонга машҳур.

- Демак, ҳозир Андижонда истиқомат қиласиз?

- Ҳа.

- Қачон келгансиз?

- 2019 йилда.

- Унга қадар кимнинг қўл остида машғулотлар олиб боргансиз?

- Жиззахда Ғайрат ва Дилшод Каримовлар қўл остида шуғулланганман.

- Андижонга келишингизни улар қандай қабул қилган?

- Ижобий. Чунки улар ўзимнинг тоғаларим бўлади. Уларнинг дуолари билан Зиёйиддин акани олдига келгандим.

- 2019 йил келганлигингизни инобатга олсак, Зиёйиддин Тайғонбоев қўл остида илк чемпионликка эришибсизда?

- Йўқ, иккинчи бор.

- Андижонга келиб, илк учраган мураббийингиз Зиёйиддин ака бўлганми? Чемпионат мобайнида сизга Ўткир Ҳайдаров ҳам кўрсатмалар бериб турди?

- Албатта, устоз Зиёйиддин Тайғонбоевга учраганман. Жуда хурсанд бўлган. Ҳозирда, 50-мактабда Зиёйиддин ака ва Ўткир ака қўл остида шуғулланаман.

- Келишингиз аввалдан гаплашилган эдими ёки дабдурустдан шундай қарорга келганмисиз?

- Жиззахдаги мураббийларим гаплашган эди. Ўзим ҳам истагимни айтгандим.

- Андижонда ҳозир фақат бокс билан шуғулланасизми ёки ўқиш ва иш, дегандек?

- Фақат боксга эътиборимни қаратганман. Ўқиш борасида эса, Жиззах давлат педагогика институтини 2019 йил тамомлаганимни айтишим мумкин.

- Мутахассислигингиз борасида ҳам ишласа бўлади, назаримда?

- Йўқ. Мен ўз олдимга улкан мақсадлар қўйганман. Яъни, жаҳон ва Олимпиада чемпиони бўлиш ниятидаман. Шунинг учун бор эътиборим машғулотларга қаратилган. Лекин хобби борасида айтадиганларим бор... J

- Табиийки, биз ва мухлислар учун бу қизиқ...?

-Қўшиқ куйлашни ёқтираман ва бунга алоҳида вақт ажратаман.

- Қайси йўналишда куйлашни мақул кўрасиз?

- Вокал ва рэп йўналишларида.

- Рэперлардан кимларни эшитасиз?

- Асосан, рус шоу-бизнесидаги Тимати, Егор Крид ва Террини...

- Эҳтимол, ўзингизни муаллифлигингиздаги қўшиқлар бордир?

- Албатта.

- Ойнаи жаҳон ёки радиоларда айлантирганмисиз?

- Йўқ.

- Демак, қачондир бу соҳани касбга айлантиришингиз мумкин эканда?

- Бундай ўйламайман. Бу хоббилигича қолади. Чунки мени боксда ўзига хос режаларим бор.

- Юқорида Олимпиада чемпионлиги ҳақида гапирдингиз. Олимпиададан сизнинг вазнингиз эмас, 51 ва 57 кг ўрин олган. Бунга қандай ечим топмоқчисиз?

- Бунинг хавотирли жойи йўқ. Олдинда жаҳон чемпионати, Осиё чемпионати ва ўйинлари турибди. Шунда муносиб иштирок этайлик,кейин ўйлаб кўрамиз.

- Ниятларингиздан келиб чиқиб, профессионал боксда ҳам фаолият юритишингизга ишонгим келяпти?

- Албатта. Ҳаваскорда ўзим кўзлаган натижаларни қайд этиб, профессионалда ҳам жанг қиламан. Ҳозирдан бу борада таклифлар бор.

- Сир бўлмаса, қайси промоутерлик компаниясидан ёки промоутердан таклифлар бўлди?

- Жаҳоннинг энг машҳур промоутерлик компанияси “Top Rank”дан таклиф бўлди. Айниқса, ушбу Ўзбекистон чемпионатидан сўнг, АҚШ ва Россия промоутерлик компанияларидан қизиқишлар юзага келди.

- “Top Rank” томонидан қизиқиш бўлса, бундан унумли фойдаланиш лозим. Ҳар кимга ҳам таклиф бўлавермайди.

- Тўғри, лекин юқорида таъкидлаб ўтганимдек, менинг ҳаваскор боксда қиладиган ишларим бор. Профессионалга ҳам вақт келади.

- Вақти келиб, профессионал боксга ўтсангиз, рингга ўз ашулангиз остида чиқиб келсангиз керак. Бу воқеликка оид ижод қиласизми?

- Шубҳасиз, бундай ниятим бор.

- Соч турмагингиз Константин Цзюни эсга солди?

- Костя Цзю энг яхши кўрган боксчиларимдан бири... Шунинг учун имижим бундай кўриниш олган. Шунингдек, Василий Ломаченко ҳам кумирим ҳисобланади.

- Ломаченконинг мухлисаси сифатида Теофимо Лопесдан учралган мағлубият борасидаги фикрларингиз қандай?

- Боксда ғалаба ва мағлубият ёнма-ён юради. “Лома” жаҳондаги техникаси энг юқори боксчи бўлса-да, Лопес жисмоний ҳолатининг мукаммаллиги эвазига яхши жанг қилди.

- Мусобақага тайёргарлик жараёнида спарринг рақиблар ҳам керак бўлади. Андижонда сиз билан спаррингга тура оладиган қизлар борми ёки ўғил болалар билан ишлайсизми?

- Қизлар камлиги учун кўпроқ ўғил болалар билан спарринг ўтказаман.

- Ҳасанбой Дўсматовнинг мураббийи қўл остида шуғулланишингиз ва биргаликда машғулотлар олиб боришингизни инобатга олсак, у ҳам сизга ёрдам берса керак?

- Албатта. Ҳасанбой ака яқиндан ёрдам беради, кўп нарсаларни ўргатади.

- Боксчи қизлар орасида энг яқин дугонангиз ким?

- Жуда кўп. Лилианна Исмоилова, Ҳадичабону Абдуллаева, Дилфуза Бекова, Сетора Турдибекова, Маҳлиё Ҳабибуллаевани айтиб ўтишим мумкин.

- Оила қурганмисиз?

- Бу ҳақида ўйлаганим ҳам йўқ. Биринчи навбатда, ўз олдимга қўйган мақсадларга эришиш ниятидаман.

- Шу кунга қадар эришган муваффақиятларингизга сабабчи бўлган инсонларга сайтимиз орқали миннатдорлик билдириш имконига эгасиз?

- Аввало, ота-онам, оила аъзоларимга, шунингдек юқорида айтиб ўтган устозларимга, жумладан, Зиёйиддин Тайғонбоев, Ўткир Ҳайдаровга чин дилдан миннатдорлик билдираман. Уларнинг қўллаб-қувватлаши ва ёрдамлари туфайли, камтарона бўлса-да, ушбу натижаларга эришдим.

- Суҳбат учун раҳмат ва ўз ўрнида олдингизга қўйган барча мақсадларингиз амалга ошишига тилакдошмиз!

- Раҳмат. Эътибордан хурсанд бўлдим.