O‘zbekiston futbol assotsiatsiyasi Keyrush bilan aloqaga chiqqan, biroq ...

O‘zbekiston futbol assotsiatsiyasi kecha milliy terma jamoamizga sloveniyalik murabbiy Srechko Katanets kelishi haqida xabar berdi. O‘FA matbuot xizmati rahbari Davron Fayziev ushbu tayinlov borasida o‘z fikrini bildirdi.

"Futbol muxlislari Srechko Katanetsning murabbiy bo‘lish ehtimoli haqidagi xabarni umumiy olganda ancha iliq qabul qilishdi. Evropa va Osiyoni ko‘rgan, bilgan mutaxassis. Jahon va Evropa chempionatiga chiqqan. Ishlagan joylarida barqaror faoliyat olib borgan. Iroq bilan o‘sishga erishgan. Eron bilan raqobatda ustunlik qilgan.

Shu bilan birga, ko‘pchilik terma jamoa murabbiyligi borasida Karlosh Keyrush nomini tilga olmoqda. Ya’ni nomzodlar orasida uning tayinlovini kutganlar bor ekan. O‘FA ko‘plab nomzodlar qatorida Keyrush bilan ham aloqaga chiqqan. U oilaviy sabablar bilan Mozambikda ekani va ayni vaqtda terma jamoani qabul qila olmasligini bildirgan", - deya yozib qoldirdi Fayziev.