Ўзбекистон миллий терма жамоаси тиббий штабига тажрибали мутахассислар жалб этилди

Ўзбекистон миллий терма жамоаси март ойида навбатдаги ўқув-машғулот йиғинлари доирасида FIFA Series мусобақасида иштирок этишидан хабарингиз бор. 

Жаҳон чемпионатига тайёргалик олиб бораётган жамоамизнинг тиббий штабига бир қатор тажрибали мутахассислар жалб қилиниши режалаштирилган.

Хусусан, узоқ йиллар давомида Италия миллий терма жамоаси шифокори сифатида фаолият юритган, спорт тиббиёти ва ортопедия соҳасида катта тажрибага эга мутахассис Энрико Кастеллаччи Ўзбекистон миллий терма жамоаси тиббий штабида иш бошлайди. Кастеллаччи Италия футбол шифокорлари ассоциацияси президенти ҳамда Италия ортопед-травматологлари миллий ассоциацияси вице-президенти сифатида ҳам фаолият олиб борган.

Шунингдек, терма жамоа тиббий штабига италиялик физиотерапевт — Симёне Сиджилйо ҳам жалб этилди. Ушбу мутахассис фаолияти давомида “Палермо”, “Салернитана” ва “Беневенто” клубларида ишлаган.