O‘zbekiston MTJ ilk turda Ektor Kuper jamoasi bilan durang o‘ynadi (o‘yin sharhi)
O‘zbekiston milliy terma jamoasi Osiyo kubogidagi yurishini Suriyaga qarshi bahs bilan boshladi. Raqibni bizga begona bo‘lmagan mutaxassis Ektor Kuper boshqarmoqda. Bundan avvalgi qit’a birinchiligida aynan Kuper janoblari terma jamoamizga ustozlik qilgandi.
Ettinchi daqiqada Suriya standart ishladi. Shu vaziyatning o‘zida raqib futbolchisi darvozamiz tomon zarba berdi. O‘tkir Yusupov qiyinchilik bilan to‘pni qaytardi.
13-daqiqada Oston O‘runovning faolligi evaziga raqibdan to‘p olib qo‘yildi. Natijada Otabek Shukurov jarima maydoni tomon yaqinlashib, ikki uch nafar futbolchidan o‘tib zarba berdi. Biroz noaniq.
19-daqiqada Hojimat Erkinov jarima maydoniga yorib kirib zarbaberdi. Bu gal ham aniqlik etishmadi.
O‘yin vaqti vaqti bilan tomonlarning unchalik ham havfli bo‘lmagan hujumlari ostida kechdi. Ammo bir narsa aniqki, suriyaliklarning darvozamiz tomon tepgan to‘plari muxlislarimizning havotirlariga sabab bo‘ldi.
Birinchi bo‘limda bog‘lamlar deyarli ishlamadi. Markazdan yorib kirishning imkoni topilmadi. Qanotlardan uzatilgan to‘plar manzilga etib bormadi. Birinchi taymda birorta aniq zarba bera olmadik. Biroq Abduqodir Husanov va Rustam Ashurmatov himoyada ancha faol harakat qildi. Ular "podkat"lari bilan raqibning hujumini buzib qo‘yaverdi. Bir so‘z bilan aytganda dastlabki 45 daqiqalikda bizga kreativ futbolchi etishmadi.
Tanaffusda Katanets ikkita o‘zgarishni amalga oshirdi. Sherzod Nasrullaev Hojiakbar Alijonovni, Abbosbek Fayzullaev Hojimat Erkinovni almashtirdi.
50-daqiqada Farruh Sayfiev uzatmani amalga oshirdi. To‘p Jaloliddin Masharipovga kelib tushdi. Masharipov qulay vaziyatda turgan Otabek Shukurovga pas berdi. Shukurov tepgan to‘pga biroz aniqlik etishmadi. Keyingi hujum ham o‘zini ko‘p kuttirib o‘tirmadi. Fayzullaev yakuniy zarbani berdi. Lekin to‘p to‘rdan o‘rin olishni istamadi.
73-daqiqada Masharipov o‘z o‘rnini Igor Sergeevga bo‘shatib berdi. Bu orqali Oston qanotdan joy oldi. Sergeev markazda to‘p tepdi.
77-daqiqada Suriya hisobni ochgandi. Yaxshi hamki gol urgan 21 raqamdagi futbolchi o‘yindan tashqari holatda qolgan ekan. Aks holda…
85-daqiqada Abbosbek uzoq masofadan bo‘lishiga qaramay zarba yo‘lladi. Raqib posboni hamyurtimiz tepgan to‘pni qiyinchilik bilan bartaraf etdi.
O‘yinning oxirgi daqiqasida Oston O‘runov o‘rniga Azizbek Turg‘unboev maydonga tushdi. Bellashuv so‘nggida vakillarimiz hujumlar yomg‘irini uyushtirdi. Biroq darvozalar ishg‘ol etilmadi. Jamoalar ilk o‘yinda 1 ochkodan ishlab oldi.
Fikrlar