Ўзбекистон Суперкубоги ҳақида нималарни биласиз? Совриннинг биринчи ва охирги соҳиби, ғалаба қозона олмаётган "Пахтакор" ва бошқалар
Бугун Самарқандда Ўзбекистон Суперкубоги бўлиб ўтади. Унда Суперлига чемпиони ва кубок соҳиби "Пахтакор" иккинчи ўрин эгаси "Насаф" билан куч синашади. Беллашув 16:00да бошланади. Учрашув олдидан Суперкубок ҳақида маълумотларни тақдим этамиз.
Ўзбекистон Суперкубоги 1999 йили ташкил этилган. Унда кубок соҳиби "Навбаҳор" Фарғонада чемпион "Пахтакор" билан беллашган ва 4:2 ҳисобида зафар қучган. Ўйинга "Нефтчи" стадиони мезбонлик қилган, 6000 мухлис баҳс шоҳидига айланган.
Суперкубок йўлга қўйилгану, лекин давом эттириш жуда қийин кечган. Сабаби 2000-2013 йиллар ўйинлар ўтказилмаган.
2014 йили кубок ва чемпион саналган "Бунёдкор" олий лигада 2-поғонани банд этган "Локомотив" билан куч синашган ва "қалдирғочлар" битта тўп фарқидаги ғалабага эришган - 2:1. Ўйин Тошкентдаги "Жар" стадионида ташкил этилган. 4751 ишқибоз ўйинга келган.
Кейинги йили кубок эгаси "Локомотив" чемпион "Бунёдкор" аренасида 7200дан ортиқроқ мухлис қаршисида чемпион "Пахтакор"ни 4:0 ҳисобида тор-мор келтирган.
2016 йили "Насаф" ҳам кубокни қўлга киритгач, чемпион "Пахтакор"ни мағлубиятга учратган 1:0. Ўшанда "Бунёдкор" стадионига 4748 ишқибоз ташриф буюрган.
2017-2018 йиллар Суперкубок ўтказилмаган. 2019 йили Суперлига ғолиби кубок соҳиби АГМКни 2:1 ҳисобида таслим этган. Беллашув "Пахтакор" ўйингоҳида 18000 мухлис қаршисида ўтказилган.
Кўриб турганингиздек, "Локомотив" Суперкубокда 2 бор зафар қучган ҳолда ушбу совринни энг кўп қўлга киритган жамоа бўлиб турибди. "Навбаҳор" ушбу кубокнинг биринчи эгаси бўлса, охирги марта "Локомотив" Суперкубокни ўзиники қилган. "Бунёдкор" ва "Насаф" ҳам бир мартадан совринга эришган. "Пахтакор" эса 3 та баҳсда имкониятни бой берган.
Бу гал "шерлар" қора анъанага барҳам бера оладими ёки "аждарлар" иккинчи марта Суперкубок ғолибига айланадими? деган саволга Самарқанддаги учрашувдан сўнг жавоб оламиз.
| Йили | Ғолиб | Ҳисоб | Мағлуб | Стадион | Томошабин |
|---|---|---|---|---|---|
| 1999 | Навбаҳор (Наманган) Ўзбекистон кубоги соҳиби (1998) | 4 : 2 | Пахтакор (Тошкент) Ўзбекистон чемпиони (1998) | Нефтчи, Фарғона | 6000 |
| 2000—2013 | Ўтказилмаган | ||||
| 2014 | Бунёдкор (Тошкент) Ўзбекистон чемпиони (2013) Ўзбекистон кубоги соҳиби (2013) | 2 : 1 | Локомотив (Тошкент) Ўзбекистон чемпионатида 2-ўрин (2013) | Жар, Тошкент | 4751 |
| 2015 | Локомотив (Тошкент) Ўзбекистон кубоги соҳиби (2014) | 4 : 0 | Пахтакор (Тошкент) Ўзбекистон чемпиони (2014) | Бунёдкор, Тошкент | 7216 |
| 2016 | Насаф (Карши) Ўзбекистон кубоги соҳиби (2015) | 1 : 0 | Пахтакор (Ташкент) Ўзбекистон чемпиони (2015) | Бунёдкор, Тошкент | 4748 |
| 2017 | Ўтказилмаган | ||||
| 2018 | Ўтказилмаган | ||||
| 2019 | Локомотив (Тошкент) Ўзбекистон чемпиони (2018) | 2 : 1 | АГМК (Олмалиқ) Ўзбекистон кубоги соҳиби (2018) | Пахтакор, Тошкент | 18000 |
Фикрлар