O‘zbekiston terma jamoasi a’zosi Italiyada muvaffaqiyatli operatsiya qilindi

O‘zbekiston terma jamoasi futbolchisi Farruh Ikromov Shvetsiyaga qarshi o‘rtoqlik uchrashuvida jarohat olgandi. O‘zbekiston futbol assotsiatsiyasi uni davolash uchun Italiyaning mashhur jarrohlaridan biri Paolo Marianini jalb etgani haqida xabar berib o‘tgandik.

Futbolchimiz Italiya poytaxti Rimda “Villa Stuart” klinikasida professor Mariani tomonidan operatsiya qilindi. Ma’lum bo‘lishicha, jarrohlik amaliyoti muvaffaqiyatli amalga oshirilgan va ayni paytda hujumchimiz o‘zini yaxshi his qilmoqda.

Bugun O‘zbekistonning Italiyadagi favqulodda va muxtor elchisi Otabek Akbarov futbolchimiz holidan xabar olish uchun kasalxonaga tashrif buyurdi va Farruh Ikromovga salomatlik tilab, tezroq sog‘ayib ketishi uchun kerakli yordam berishga tayyorligini bildirdi.

Manba: O‘FA matbuot xizmati