Ўзбекистонлик собиқ WBC чемпиони фаолиятини якунлади...Энди нима қилмоқчи?

Бокс бўйича собиқ жаҳон чемпиони Олег Маскаев фаолиятини якунлаганидан кейин Саранскдаги ўз мактабида ишлашини маълум қилди.

Бир неча кун аввал, 50 ёшли Маскаев боксдаги фаолиятига якун ясаганлигини эълон қилганди.

“Саранскда ўзимнинг бокс мактабимда ишлашни режалаштирганман. Мен йигитларга ўз тажрибамдан келиб чиқиб, сабоқ бермоқчиман”, - дейди Маскаев ТАССга иқтибос келтирган ҳолда.

Эслатиб ўтамиз. Олег Маскаев асли Қозоғистонда туғилган бўлсада, Ўзбекистонда харбий хизматни ўташ асносида, юртимиз номидан халқаро ареналарда рингга кўтарилади. У ҳаваскор боксда +91 кгда 1994 йил Осиё ўйинлари ғолиби, 1995 йил Жаҳон Кубоги совриндори бўлган. Олег аслида, 16 ёшгача Қозоғистоннинг Караганда шаҳрида хоккей билан шуғулланган. Кейинчалик, Россия фуқоролигини қабул қилганди.

Маскаев оғир вазн тоифасида WBC йўналишининг (2006-2008) собиқ чемпиони ҳисобланади. Маскаев сўнгги жангида 2013 йил 4 ноябрь куни британиялик Денни Уилямсни мағлубиятга учратди. Ўшандан бери боксчи рингга қайтиш истагини билдирди. У фаолияти давомида профессионал рингда 39 та ғалаба (28 та КО) ва етти мағлубият қайд этган.