"Ўзбекнефтегаз" футбол клубларини молиялаштиришни нега тўхтатганини маълум қилди

"Ўзбекнефтегаз" Давлат нефть-газ компанияси 1 январдан бошлаб футбол клубларини молиялаштиришни тўлиқ тўхтатди. Бу ҳақда 20 апрель куни ўтказилган матбуот анжуманида компания бошқаруви раисининг биринчи ўринбосари Суҳроб Ҳамраев маълум қилди.

Февраль ойида ОАВларда компания Ўзбекистон футбол ассоциациясига расмий хат йўллаб, "Насаф", "Бухоро" ва "Бунёдкор" клубларини молиялаштириш тўхтатилгани ҳақида хабар бергани айтилган эди. Шунингдек, аввалроқ "Машъал" (Муборак газни қайта ишлаш заводи клуби) ва "Шўртан" ("Шўртаннефтегаз" корхонаси томонидан қўллаб-қувватланган) жамоалари ҳам "Ўзбекнефтегаз" тизими орқали молиялаштирилган.

"Футбол клубларини молиялаштиришни тўхтатиш норасмий маълумот эмас, биз бу ҳақда бир неча бор айтганмиз. Охирги марта президент томонидан спонсорлик молиялаштиришни тўхтатиш бўйича қарор қабул қилинди. Бу давлат топшириғи эди. 1 январдан молиялаштириш босқичма-босқич эмас, балки дарҳол тўхтатилди. Ҳозирги кунда бирорта футбол клуби бизнинг томонимиздан молиялаштирилмаяпти", — деди Ҳамраев.