Ўзимизга қайт, “Реал”да ўйнай олмаяпсан

«Ливерпуль» мутасаддилари ҳозирда «Реал» сафида тўп сураётган ўнг қанот ҳимоячиси Трент Александер-Арнольдни яна жамоага қайтариш имкониятини кўриб чиқмоқда.

«Ливерпуль» билан амалдаги шартномасини узайтиришдан бош тортган Трент 2025 йил ёзида «Реал»га ўтган эди. Бироқ у ўтган мавсумда Испания чемпионати — Ла Лига доирасида фақат 14 та учрашувни асосий таркибда бошлади.

Жозе Моуриньо «Реал» бош мураббийи лавозимига қайтганидан кейин ҳам англиялик футболчининг аҳволи яхшиланмади. 28 ёшли ҳимоячи ўзининг асосий позициясида номинал ярим ҳимоячи Федерико Вальвердега рақобатда ютқазиб қўймоқда.

TEAMtalk нашрининг хабар беришича, Александер-Арнольд Мадриддаги ҳаётидан мамнун, аммо ўйин амалиёти етишмаётганидан норози.

Трентнинг вазияти нафақат «Ливерпуль», балки «Арсенал», «Челси», «Манчестер Сити» ва ҳатто «Бавария» клубларининг ҳам эътиборини тортган.

«Ливерпуль» ҳалигача Трент билан хайрлашувдан кейинги муаммоларни тўлиқ бартараф эта олмаган. Унинг ўрнига жалб қилинган Жереми Фримпонг эса беқарор ўйин намойиш этмоқда ва мунтазам равишда жароҳатлар туфайли сафдан чиқмоқда.

«Реал»га яқин манбанинг таъкидлашича, Мадрид клуби Александер-Арнольддан қутулишга интилмаяпти. Бироқ футболчининг ўйини яхшиланмаса, клуб унинг трансфери бўйича мақбул таклифларни кўриб чиқишга тайёр бўлади.