"Ўзимни кўрсатишимга ишонаман" - "Андижон"да фаолият олиб борган мураббий бошқа чемпионатда иш бошлади

Мухлислар учун яхши таниш бўлган собиқ футболчилардан бири Анвар Абдуқодиров ўтган мавсумни “Андижон” жамоасининг мураббийлар штабида ўтказди.

Унинг акаси Қаҳрамон Абдуқодиров ҳам ўз пайтида кўзга кўринган, таниқли ўйинчилардан бўлганди. Айни пайтда ака-укалар ўзларини мураббийлик соҳасига бағишлаганлар.

Андижон футболи тарбияланувчиси кичик Абдуқодиров бир қатор жамоаларда ва хусусан “Нефтчи”даги фаолияти орқали ишқибозлар эслаб қолишган бўлса ажаб эмас.

Эндиликда Анвар Абдуқодировнинг фаолиятида янги саҳифа очиляпти. Боиси, у Қирғизистон чемпионатидан тушган таклифни қабул қилди. Мамлакат олий лигасининг янги иштирокчиси “ЎшМуАлдиер” клубида иш бошлади. Аслида бош мураббий маҳаллий Ойбек Сулаймонов. Аммо ҳозир жамоадаги асосий ишни Анвар Абдуқодиров бажаряпти.  

- Ўзим учун мураббийлик фаолиятимни бошлашим керак эди, - дея гап бошлади, Абдуқодиров. - Яхши мураббий бўлиш ниятим бор. Бу менинг мақсадларимдан бири. Менга Қирғизистондан таклиф бўлиб қолди. Жамоа бу йил биринчи марта олий лигага чиқди. Клубга келиб юрган ўзбек футболчилари бор экан. Жамоа раҳбарияти ўшалар орқали мени топишибди. Кейин чақиришди, бориб гаплашдим. Ҳаммаси ёқди, шундай қилиб клубда иш бошладим. Футболчилик фаолиятимни тугатганимдан кейин яхши мураббий бўлиб, ўзбек футболига ёрдамим тегишини ният қилганман. Ёшларга ҳам фойдам тегса бундан фақат хурсанд бўламан. Қаерда бўлсам ҳам мураббий сифатида ўзимни кўрсатишим керак.

- Демак, расман иш бошлабсиз-да?!

- Ҳа, бу ерда ишни бошладим. Қирғиз футболи учун шароитлари яхши. Ишласа бўлади. Ҳозирги кунда йиғинларимиз Ўш шаҳрида давом этяпти. “Каганат” жамоасининг футбол академиясида йиғин ўтказяпмиз. Биринчи даврадаги ўйинларимизни “Алай” стадионида ўтказиб турамиз. Ўзимизни стадионда таъмирлаш ишлари олиб бориляпти.

- Дебютант клуб қандай мақсад учун курашади?

- Жамоанинг мақсади кучли бешталикка олиб чиқиш. Кунига икки маҳалдан машғулот ўтказяпмиз. Машғулот жараёнларини ўзим олиб боряпман. Менга кўмаклашадиган маҳаллий мураббий бор.

- Биламизки, Қирғизистоннинг “Дордой”, “Алай” сингари етакчилари бор. Уларга қандай қаршилик кўрсатмоқчисизлар?

- Сиз айтган “Дордой”, “Алай” каби клубларга бемалол жиддий қаршилик кўрсатадиган жамоа шакллантиряпмиз. Бизни жамоанинг ўз мақсади бор. Бу вақтинчалик клуб эмас.

- Сиз ишлаётган жамоага ўзбекистонлик футболчилар ҳам чақириляптими?

- Албатта, Ўзбекистондан ҳам ўйинчиларни чақирганмиз. “Машъал”дан Марадона Сафаровни таклиф қилганмиз. Қолаверса, бир қатор жамоаларимизда ўйнаган Абдураҳмон Абдулхақов ҳам шу ерда. У ўтган йили “Машъал”да ва “Янгиер”да тўп сурганди. Бемалол шуларга ўхшаган футболчиларни чақиришимиз мумкин, бунинг учун шароит бор.

- Бу клубни тарихи қандай? Ким молиялаштиради?

- Бу жамоа 1994 йилдан бери бор. Олдин номи “Алдиер” бўлган. Ўш миллатлар Университети бор ва бу йилги жамоа ушбу Университет билан ҳамкорликда ташкил қилинган. Шунинг учун номи “ЎшМуАлдиер”. Университет ҳомийлигида иштирок этамиз. 

- Қирғизистонда мураббий сифатида ўз сўзингизни айтишга тайёрмисиз?

- Мен ишлашга ва ўзимни кўрсатишга тайёрман. Ўтган йили “Андижон”да Виктор Кумиков қўли остида ишладик. Ундан анча-мунча нарсани ўргандик. Ўзим ҳам бир қатор яхши клубларда ва тажрибали мутахассислар бошчилигида тўп сурганман. Улардан ҳам ўзим учун керакли нарсаларни ўрганганман. Бемалол ишлаб, ўзимни кўрсатишимга ишонаман.

Шуҳратбек Жўраев.