"Париж-2024". Медаллар сони бўйича етакчи номини аниқлаб берувчи баҳс давом этмоқда

Олимпия ўйинлари медаллар ҳисобидаги 1-ўрин тақдири баскетбол бўйича аёллар турнирининг финалида ҳал бўлади.

Айни дақиқаларда Париждаги Олимпия ўйинларида баскетбол бўйича аёллар ўртасидаги мусобақанинг финал баҳси бўлиб ўтмоқда. Олимпиада дастурининг якуний босқичида АҚШ ва Франция терма жамоалари чемпионлик учун баҳс олиб боришмоқда. Ушбу баҳсда ҳозирча дурранг 25-25 ҳисоби қайд этилмоқда.

Айни дамда Хитой 40 та олтин медаль билан умумий медаллар рейтингида пешқадамлик қилиб турибди. Америкаликларда эса бу кўрсаткич ҳозирча 39 тани ташкил этмоқда.

Баскетбол турнирида Қўшма Штатлар ғолиб чиқса,  Олимпия ўйинларида олтин медаллар сони бўйича Хитой билан тенглашади. АҚШ вакилларининг кумуш медаллари кўпроқ (44-27) бўлгани учун баскетболчиларнинг ғалабаси АҚШни медаллар жадвалида биринчи ўринга олиб чиқади.

Маълумот учун, Париж Олимпиадаси бугун, 11 август куни якунланади. Жами 329 та мукофотлар ғолибларга топширилади.