"Париж-2024". Спортчиларимизнинг бугунги иштироки ва қайд этган натижалари билан танишинг!

Хабарингиз бор, яна бир неча дақиқалардан кейин 2024 йилги Олимпиада ўйинларининг расмий очилиш маросими бўлиб ўтади. 

Бугундан бошлаб эса деярли барча спорт турларидан беллашувлар старт олади. Биз эса мусобақа якунига қадар ҳар куни баҳсларга киришадиган спортчиларимиз ҳақида батафсил маълумот бериб борамиз. 

Қуйида вакилларимизнинг натижаларидан онлайн хабардор бўлишингиз мумкин. 

Спорт гимнастикаси бўйича вакилларимиз Абдуллоҳ Азимов, Ҳабибулло Эргашев ва Расулжон Абдураҳмонов ўз чиқишларини намойиш этди. 

Бокс бўйича -54 кг вазн тоифасида иштирок этаётган Нигина Ўктамова кейинги босқичга йўл олди, сабаби рақиби жанг қилишдан бош тортди.

Велоспорт бўйича тажрибали вакилимиз Ольга Забелинская 32.4 км масофага кечган баҳсда 43:53.51 дақиқа натижа кўрсатди. Якунда бу 23-кўрсаткич бўлди. Энди у 4-август куни гуруҳ пойгаси дастурида Янина Кускова билан медаллар учун курашади.

Сузиш бўйича эркаклар ўртасида ҳамюртимиз Илия Сибирцев 400 метрлик масофадаги баҳсда учинчи бўлиб маррага етиб келди ва афсуски бу натижа ҳам кейинги босқичга етарли бўлмади.

Сузиш бўйича 400 метрлик масофада ҳамюртимиз Анастасия Зеленская маррага учинчи бўлиб етиб келди ва бу натижаси ҳам кейинги босқич учун етарли бўлмади.

Академик эшкак эшиш борасида вакилимиз Анна Пракатен учинчи гуруҳда иккиничи ўрин билан маррага етриб келди ва кейинги босқичга йўл олди.

Вакиллармиз орасида биринчи бўлиб иштирокини бошлаётган дзюдочимиз Ҳалима Қурбонова -48 кг вазн тоифасида Озарбайжонлик Лейла Алиевага қарши татамига чиқди ва юко баҳоси билан ғалаба қозонди ва кейинги босқичга йўл олди. Чорак финалда афсуски, швециялик рақибига иппон баҳоси билан мағлуб бўлди.

Эркаклар ўртасида -60 кг вазн тоифасида Достон Рўзиев украиналик Дилшод Холматовга "golden score"да имкониятни бой бериб қўйди.

Бугун иштирок этадиган спорчиларимиз билан танишинг!