"Пахтакор" Ўзбекистонга энг катта балл коэффицентини келтирган бўларди, агарда...

Қатарда марказлашган ҳолда ўтган мусобақада "Пахтакор" чорак финалгача етиб борди.

Охирги марта "шерлар" Чемпионлар Лигасида гуруҳ баҳсларидан 2010 йилда нимчорак финалга йўл олишни уддалаганди. 2009 йилдан бери эса, чорак финалда ўйнаш насиб қилмаганди. Жорий мавсумда "Пахтакор" ушбу нохуш анъаналарга барҳам беришга эришди. Бунгача жамоа 2003, 2004 ва 2009 йилларда мусобақанинг чорак финалида ўйнаганди.

Шу тариқа, 11 йил чорак финалсиз давом этган нохуш натижага чек қўйилди. "Шерлар" 4-бор мусобақа чорак финалида иштирок этди. Сўнгги мавсумларда жамоанинг турнирдаги натижаси юқорига томон ҳаракатланмоқда. 2019 йил гуруҳ босқичида яхши ўйин кўрсатиб, барча жамоаларга етарлича қаршилик кўрсата олишини исботлаган "Пахтакор" бу йил Осиё етакчиларига сафига қайтаётганини намойиш қилди.

Шу ўринда, "Пахтакор"нинг учрашувларда қайд этган турли кўрсаткичлари бўйича кўриш мумкинки, "шерлар" "Персеполис" билан ўйиндан ташқари қолган баҳсларда рақибдан устунлик қилган. Чорак финалда 15-дақиқадан бошлаб камчиликда қолган жамоа дарвозага рақибдан кўпроқ аниқ зарба беришни уддалаган. Афсуски, рақибнинг дарвозага берган икки тўғри зарбаси голга айланган.

"Ал-Ҳилол" билан расман бекор қилинган икки ўйинни ҳисобдан чиқариб ташласак, "Пахтакор" "ОЧЛ-2020"да жами 6 ўйинда майдонга тушиб, 4 ғалаба, биттадан дуранг ва мағлубият қайд этди. Рақиб дарвозасига 8 гол уриб, 4 тўп ўтказиб юборди.

Агарда ушбу мавсумдаги кўрсаткичлар ҳисобга олинганида, тошкентликлар Ўзбекистонга энг катта балл коэффицентини келтирган бўларди. "Пахтакор" коэффицент учун жами 19 балл тўплашга эришганди. Бироқ ОФК Кубоги мусобақаси якунига етмагани сабабли жорий йилги баллар ҳисобга олинмайди.