"Пахтакор"нинг янги мураббийи ўтган мавсумда қандай натижалар қайд этган?

Тошкентнинг "Пахтакор" клуби бугун жамоанинг янги мураббийини эълон қилди. Ушбу лавозимга португалиялик мутахассис Педро Морейра тайинланди.

49 ёшли мураббий кўп йиллар давомида ҳозирда "Милан"да ишлаётган Пауло Фонсеканинг ёрдамчиси сифатида фаолият юритган. 

Морейра ўтган мавсум қисқа муддат давомида португалиянинг "Каза Пия" клубини бошқарган.

Мутахассис қўл остида жамоа умумий 11 та баҳс ўтказган. Ушбу давр давомида "Каза Пия" учта ғалаба, бир дуранг ва етти беллашувда имкониятни бой берган. Икки ойдан кўпроқ муддатда жамоага устозлик қилган мураббий 21-турдан сўнг ўз ўрнини бошқа ҳамкасбига топширди.

Морейра 11 ойлик танаффусдан сўнг "Пахтакор" жамоасида фаолиятини давом эттирадиган бўлди.