Pike "Barselona" muxlislariga xayrlashuv maktubini yo‘lladi

Himoyachi Jerar Pike faoliyatini yakunlagani haqida ma’lum qildi. U ketishi oldidan "Barselona" muxlislariga xayrlashuv maktubini yo‘lladi:

“Oxirgi haftalar, oylar ichida ko‘pchilik men haqimda gapirdi. Lekin shu paytgacha men ularga javob bermadim. Endi esa men gapiraman.

Ko‘pchiligingiz kabi men ham doimo "Barsa" muxlisi bo‘lganman. Men futbol muxlislari, aniqrog‘i "Barselona" muxlislari oilasida tug‘ilganman. Kichkinaligimda futbolchi emas, balki "Barsa" futbolchisi bo‘lishni xohlaganman.

So‘nggi paytlarda bolaligim haqida ko‘p o‘yladim. Agar o‘shanda kimdir menga barcha orzularim ro‘yobga chiqishi, "Barsa"ning asosiy tarkibiga kirishim, barcha mumkin bo‘lgan sovrinlarni qo‘lga kiritishim, Evropa va jahon chempioni bo‘lishim, dunyoning eng zo‘r futbolchilari bilan o‘ynashim va "Barsa"ning asosiy tarkib futbolchisi bo‘lishimni aytsa, ishonmas edim.

"Barselona"ga kelganimga 25 yil bo‘ldi. Men ketdim, lekin qaytib keldim. Futbol menga hamma narsani berdi, "Barsa" menga hamma narsani berdi.

Yosh "Barsa" muxlisining barcha orzulari amalga oshdi, men sizga qarorim haqida aytmoqchiman. Bu sayohatni yakunlash vaqti keldi. Men doim "Barsa"dan boshqa jamoam bo‘lmasligini aytganman va shunday bo‘ladi.

Shanba kungi o‘yin mening "Kamp Nou"dagi oxirgi uchrashuvim bo‘ladi. Keyin jamoaning doimiy muxlisiga aylanaman, ularni qo‘llab-quvvatlayman. Men ham xuddi ota-onamga o‘xshab, "Barsa"ga bo‘lgan muhabbatimni farzandlarimga singdiraman.

Shuni aytishim mumkinki, ertami-kechmi men albatta qaytib kelaman. "Kamp Nou"da ko‘rishguncha. Olg‘a "Barselona"! - dedi Pike.

Ispaniyalik himoyachi 1997 yildan 2004 yilgacha "Barselona" akademiyasida shug‘ullangan, shundan so‘ng "Manchester Yunayted"ga o‘tgan va 2008 yilda yana Kataloniyaga qaytib kelgan.

"Ko‘k-anorranglilar" bilan 8 marta Ispaniya chempioni, 7 marta Ispaniya kubogi, 6 marta mamlakat Superkubogi, 3 marta Chempionlar ligasi va UEFA Superkubogi, 3 marta klublar o‘rtasidagi jahon chempionatida g‘alaba qozongan.

Pike Ispaniya terma jamoasi bilan Evro-2012 va JCh-2010da g‘olib chiqqan.