Почеттинонинг ПСЖдан кетиш нияти йўқ

“Пари Сен-Жермен” клуби бош мураббийи Маурисио Почеттино парижликлар сафидаги келажаги ҳақида гапирди.

"ПСЖ билан яна бир йил шартномам бор. Мантиқан олиб қараганда, бу ерда гап истакда эмас, шартномада.

Бу клубнинг асосий мақсадларидан бири – Чемпионлар лигасида ғалаба қозониш. Муваффақиятга эриша олмаганимиздан жуда хафамиз, лекин ҳар куни Чемпионлар лигасида ғалаба қозониб бўлмайди.

Бироқ мавсум якунига етгани йўқ, биз ҳали чемпионликни қўлга киритганимиз йўқ ва бор эътиборимизни шу вазифага қаратганмиз. Вазифа бажарилгач, бирга ўтириб, жамоанинг келажагини муҳокама қиламиз”, - деди аргентиналик мутахассис.