Почеттинонинг тақдири Мбаппенинг қўлида

“Пари Сен-Жермен”нинг асосий ўйинчисига айланиб қолган Килиан Мбаппе жамоа бош мураббийи Маурисио Почеттинонинг иш услубидан мамнун экани ва қониқаётганини билдирди. Мутахассисларнинг таъкидлашича, 23 ёшли ҳужумчининг бу баҳоси клуб раҳбариятининг фикрини ўзгартириб, аргентиналик мураббийни ўз лавозимида олиб қолиш учун кифоя қилади.

Мбаппенинг клуб хўжайинлари билан келишувига кўра, футболчи клуб раҳбариятининг муҳим қарорларига таъсир ўтказиш ваколатига эга.

Ана шу маънода, Мбаппе Маурисио билан жуда яхши алоқаларга эга эканини таъкидлагани Почеттинонинг клубдаги фаолиятини таъминлаб беради.

Почеттино қўл остида парижликлар миллий чемпионатда, Франция кубоги ва Суперкубогида ғолиб чиқди. Аргентиналик мутахассис ПСЖ бош мураббий сифатида жами 84 та учрашув ўтказиб, 54 та ғалаба, 13 та дуранг ва 15 та мағлубият қайд этди.