Полвонларимизнинг ғалабали юришлари давом этмоқда

Аввал хабар берганимиздек, жорий йилнинг 10-16 ноябрь кунлари Россия Федерациясининг Қозон шаҳрида белбоғли кураш бўйича катталар, ёшлар ва ўсмирлар ўртасида  жаҳон чемпионати ўтказилмоқда. 30 дан ортиқ давлатларнинг энг сара  курашчилари иштирок этаётган жаҳон чемпионатининг илк кунида белбоғли курашнинг эркин йўналишида иштирок этган Ўзбекистон эркаклар ва аёллар терма жамоаси 4 та олтин, 2 та кумуш ва 2 та бронза медалини қўлга киритиб, умумжамоа ҳисобида фахрли биринчи ўринни эгаллашган эди. Кеча 12 ноябрь беллашувларнинг иккинчи кунида белбоғли курашнинг классик йўналишида катталар ўртасидаги беллашувларда ҳам вакилларимиз 1 та кумуш ва 3 та бронза медалларни жамғаришга муваффақ бўлишди. 

Кумуш медаль 
100 кг. Ойбек Муҳаммадов

Бронза медаль 
68 кг. Асрор Солижонов
75 кг. Муроджон Ҳамидов 
82 кг. Шукрулло Маматкаримов. 

Мусобақа регламентига кўра, бугун, 13 ноябрдан ёшлар ва ўсмирлар ўртасидаги жаҳон чемпионати беллашувларига старт берилди. Бугунги баҳсларда ёшлар терма жамоамиз бош мураббийи Бахтиёр Турғунпўлатов шогирдларига омад тилаймиз. Мусобақалар 16 ноябрга қадар давом этади.

Дарвоқе, белбоғли кураш бўйича ҳалқаро тоифадаги ҳакамларимиздан Мираншоҳ Рўзиев, Сергей Тхак, Неъматулла Тўйчиев ҳамда Элмурод Абдуллаевлар ушбу жаҳон чемпионатида ҳакамлик вазифасида ишлашмоқда.