Премьер-лига антирекордчиси Ҳусановга қандай баҳо берди?
Ўзбекистон миллий терма жамоаси марказий ҳимоячиси Абдуқодир Ҳусанов “Ланс”дан “Манчестер Сити”га кўчиб ўтиши билан “шаҳарликлар”нинг асосий таркиб ўйинчисига айланди.
Ҳозир манчестерликлар ҳимоя чизиғини бир неча учрашувдан бери жамоасининг энг фаол ўйинчиларидан бири сифатида эътироф этилаётган ўзбек легионерисиз тасаввур қилиб бўлмайди.
Табиийки, оммавий ахборот воситалари ходимлари, Англия футболи мутахассислари, мураббийлари, таҳлилчилари ҳам 21 ёшли ҳамюртимизнинг фаолиятини синчковлик билан кузатиб бормоқда.
Англия Премьер-лигасида узоқ йиллар фаолият кўрсатган исландиялик ҳимоячи Ричард Данн ўзининг собиқ жамоаси “Манчестер Сити” трансферларига муносабат билдирар экан, январда олинган янги ўйинчилар, хусусан, Абдуқодир Ҳусановнинг имкониятларига баҳо бериб ўтди.
- Абдуқодир Ҳусановнинг яқинда “Манчестер Сити”га ўтгани ва жамоа ўйинига таъсир ўтказа бошлаганини ижобий баҳолайман.
Одатда, “Сити” ўз сафига янги ижрочиларни қўшиб олса, уларнинг жамоага мослашиб олиши, мураббийларнинг талабларини ва ўзини нималар кутаётганини тўлиқ тушуниб етиши учун муайян вақт талаб этилар эди.
Абдуқодир Ҳусанов эса, жамоага ёрқин тарзда киришиб кетди, деб ҳисоблайман. Албатта, “Челси”га қарши дебют учрашувнинг боши у ҳақида жуда қўпол таассуротларни уйғотгани бор гап, лекин буларнинг бари аввало футболчининг ўзи учун кутилмаган ҳолат эди. Ана ўшандан кейин Ҳусанов кучли ўйинчига айланди.
Абдуқодир “Манчестер Сити” учун ажойиб трансфер бўлиб чиқди. Ҳудди шу фикрни Умар Мармушга нисбатан ҳам айтишим мумкин.
Мисрлик ҳужумчи ортга қайтиб ўйнашдан қочмайди, жамоадаги шерикларига қулай вазият яратиб бериш мақсадида майдон ичкарисидан ҳам ҳужум уюштиради, ўзи гол уришга анча уста.
Айни пайтда Абдуқодир Ҳусанов ҳам, Умар Мармуш ҳам жуда яхши ўйнаяпти. Жамоада мана шу футболчилар даражасига чиқа оладиган кўпроқ ижрочилар бўлиши мақсадга мувофиқ.
Январда жамоага келганлардан Нико Гонсалес ҳам бор. Лекин мен бу футболчини супер иқтидор эгаси эмас, балки барқарорликка эътибор қаратадиган ярим ҳимоячи, деб биламан.
Шунга қарамай, ҳали жамоада кучайтирилиши лозим бўлган нуқталар бор. Аслида бу ишлар яқинлашиб келаётган ёзга мўлжалланган эди. Лекин юзага келган вазият туфайли клуб янги таркибни шакллантиришни январь ойидан бошлаб юборди ва бир неча муҳим трансферларга қўл урди. Энди “Манчестер Сити” жамоани кучайтиришни жорий мавсум якунланганидан кейин ҳам давом эттиради, - деди Ричард Данн.
Таъкидлаш жоизки, асли ирландиялик бўлган Ричард Данн қарийб йигирма йил давоми этган профессионал фаолиятини Англия Премьер-лигасида ўтказган. У дастлаб, “Эвертон”да тўрт йил ўйнагач, 2000 йили “Манчестер Сити”га кўчиб ўтади ва “шаҳарликлар” сафида тўққиз йил тўп тепиб, жамоага сардорлик ҳам қилади.
Кейинчалик “Астон Вилла” ва “Куинз Парк Рейнжерс” жамоалари шарафини ҳимоя қилиб, бутсаларини 2015 йили михга илади.
Ричард Данн Англия Премьер-лигаси тарихига иккита кўрсаткич билан кирган. Ирландиялик ҳимоячи 2009 йили “Уиган Атлетик” билан баҳсда фаолиятидаги саккизинчи қизил карточкани олади ва бу кўрсаткич бўйича рекордчилар – Патрик Виейра ва Данкан Фергюсон натижасини такрорлайди.
Энг қизиғи эса, Ричард Данкан Премьер-лига тарихида ўз дарвозасига энг кўп – ўнта автогол урган ягона футболчи сифатида антирекорд ҳам ўрнатиб қўйган.
Фикрлар