Prevyu. "Navbahor" - "Mash’al"

O‘zbekiston Superligasining 14-turi doirasida "Navbahor" o‘z maydonida uch yillik tanaffusdan so‘ng yana Superligaga qaytgan “Mash’al” (Muborak)ni qabul qiladi. Klub matbuot xizmati o‘yin oldidan statistik raqamlarni ma’lum qildi.

Mazkur klublar Superliga (oliy liga) o‘yinlarida 38 marta bir-birlariga qarshi maydonga tushishgan. Ushbu 38 ta bahsdan 16 ta uchrashuvda muborakliklar g‘alaba qozonishgan, 14 tasida namanganliklar g‘olib chiqqan bo‘lsa, 8 ta o‘yinda tomonlar durangga imzo chekkan.

“Navbahor” shu kunga qadar “Mash’al”ga qarshi o‘tkazilgan o‘zaro uchrashuvlarda 48 ta to‘p kiritib, o‘z darvozasidan 47 marta to‘p olib chiqqan.

Mazkur jamoalarning o‘zaro bahslarida “Mash’al” 56 ochkoni, “Navbahor” esa 50 ochkoni qo‘lga kiritgan. O‘zaro uchrashuvlardagi eng yirik hisob 1995 yili kuzatilgan. O‘sha yili Namanganda “lochinlar” 8:0 hisobida g‘alaba qozonishgan. Muborakliklar esa 2008 yilgi mavsumda "Navbahor"ni 5:0 hisobida mag‘lubiyatga uchratishgan.

Ushbu klublarning  shu kungacha Namanganda bo‘lib o‘tgan 19 ta bahsidan 12 tasida “lochinlar” g‘alaba qozonishgan, 4 o‘yinda jamoalar durangga imzo chekishgan, 3 ta o‘yinda muborakliklar zafar quchishgan.

Namangandagi bahslarda “Navbahor” raqib darvozasiga 34 ta gol urib, o‘z darvozasidan 11 ta to‘p olib chiqqan (Izoh: 2020 yili Namanganda o‘tkazilishi kerak bo‘lgan o‘yin COVID – 19 pandemiyasi sababli, Toshkentdagi “Jar” stadionida o‘tkazilgan va unda “Navbahor” nominal mezbon bo‘lgan).

Eslatib o‘tamiz, “Navbahor” – “Mashʼal” bahsi 28 iyun kuni Namangandagi “Markaziy” stadionda soat 19:00 da start oladi.