Президент Мбаппени ўз ҳимоясига олди

ПСЖ президенти Нассер Ал-Хелаифий жамоанинг энг ёрқин юлдузи Килиан Мбаппе атрофидаги воқеаларга муносабат билдирди.

Маълумки, 25 ёшли ҳужумчининг клуб билан шартномаси тез орада якунланади. Матбуотда Килианнинг қайси жамоада ўйнаши кенг муҳокама қилиняпти.

Футболчининг ўзи фаолиятини қаерда давом эттириш бўйича якуний қарорга келмаганини айтгани вазиятни янада чигаллаштириб юборди.

- Ҳаммадан Килианни тинч қўйишни сўрайман. Мен унга ишонаман. Мбаппе ҳеч қачон клубга қарши иш қилмаган. Биз бир оиламиз, шунинг учун уни тинч қўйинг. Ўз ўйинчимни ҳимоя қилишни истайман.

Жамоамиздаги ҳар бир футболчи биз учун жуда муҳим. Шу боис, оммавий ахборот воситаларини вазиятни юмшатишга чақираман, - деди Нассер Ал-Хелаифий.