Про-лига трансляция қилиниши эвазига футболчимиз легионерга айланди. Бироқ у ерда ўсиши мумкинми?

Про-лигада Ғузорнинг “Шўртан” клуби шарафини ҳимоя қилган дарвозабон Мирзоҳид Маматхонов фаолиятини кутилмаганда ўзгартиришга қарор қилди. Бундан буён у Мальдив ороллари чемпионатида иштирок этади. Янги клубининг номи “Супер Юнайтед спортс” жамоасидир.

Барчамизга асосан саёҳат қилинадиган давлат сифатида таассурот қолдирадиган Мальдивда футболнинг даражаси қандай эканлигидан яхши хабардор эмасмиз. Илгари у ерда ўзбекистонлик Алишер Аҳмедов деган футболчи ҳам тўп сурганини эслаб қолганмиз. Қизиғи, у ҳам Маматхонов каби дарвозабон эди.

“Шўртан”нинг биринчи рақамли посбони ҳисобланган Мирзоҳиднинг Мальдив оролларига кўчиб ўтиши қай тариқа юз бергани хусусида футболчининг ўзи қуйидаги сабабни айтди:

-  Про-лига ўйинлари ҳам катта экранларга чиққани туфайли агентлар эътибор бера бошлади. Телевизор орқали намойиш этилган учрашувлар ҳамда “Ютуб” тармоғи орқали ҳам кўрсатилган беллашувлар орқали жиддий кузатишяпти. Менга ҳам айнан “Ютуб”даги ўйинларимизни кўриб кейин алоқага чиқди. Тўғриси, Мальдивдан таклиф сентябрь ойларининг бошларида бўлди. Тахминан 20 октябрларга келиб музокаралар охирига етди. Олдимда Мальдив чемпионатидан иккита таклиф бор эди. Биттаси ОФК Кубогида иштирок этиши маълум эди. Мен қўшилган клуб эса янги ташкил этилган. Олдига юқори мақсадларни қўйган. Бу йил чемпионлик ёки Кубок учун курашади. Асосий мақсад ОФК Кубоги йўлланмасини қўлга киритиш. Клуб бош мураббийи бир пайтнинг ўзида Мальдив ороллари терма жамоасини ҳам бошқаради. Бу жамоа ўз сафига тажрибали футболчиларни жалб қила бошлади. Шу сабабли ҳам мен уларнинг таклифини қабул қилдим.

Албатта, ҳамюртимизга у ерда фақат омад тилаб қоламиз. Аммо Мальдивда футбол даражаси қандай, чемпионатининг савияси-чи? Халқаро майдонларда ҳам клублари ёки терма жамоаси бирор нимани қойиллатиб қўйганини кўрмаганмиз. Шундай экан, Маматхонов тўп сурадиган чемпионатнинг мавқеи қандайлигини бироз тасаввур қилса бўлади. Балки Мальдив футболи про-лигамиздагига ўхшашдир-а? Бу хусусида Мирзоҳид қуйидагиларни қўшимча қилди:

-  Тўғри, мен ҳам сизнинг фикрларингизга қўшилардим, токи бу ерга келмагунимча. Одам бирор нимани ўз кўзи билан кўрмагунича ҳеч нимага ишонмайди-ку. Бунга қадар ўзим ҳам Мальдив чемпионатини кучсиз деб ўйлардим. Ҳа, қаердадир даражасининг пастроқлиги билинар, аммо про-лигамиздан катта фарқини кўрмадим. Чунки ҳозир ҳамма футболни ўрганиб олган. Олдин савия ер билан осмонча дейиларди. Ҳозир эса осон ўйинларнинг ўзи қолмаган. Куни кеча жамоамиз ўтган йили Кубокни қўлга киритган клуб билан ўртоқлик учрашувини ўтказди. Клублар ўртасида катта тавофут йўқ, савияси ҳам чакки эмас. Тўғри, чемпион жамоа бу мавсумда ҳам кучлироқ кўриняпти. Бизнинг жамоа эса унга рақобатбардош бўлиши учун яхши ўйинчиларни тўплади. Мендан ташқари ҳар бир клубда тўрттадан легионер фаолият олиб бориш ҳуқуқига эга. Бизнинг жамоада иккита япониялик ва битта испаниялик легионер ҳам бор, ўзим билан тўрттамиз. Ўз навбатида “Шўртан” жамоасига раҳмат айтмоқчиман. Менга келган таклифни улар тўғри тушунишди. Собиқ клубимга омад тилаб қоламан. Суперлигага чиқади, деган умиддаман. Бу ердан туриб бўлса ҳам “Шўртан”га мухлислик қилиб тураман.

Футболчининг Мальдив футболи савияси ҳақидаги фикрини эшитдингиз. Қизиқ, Мирзоҳид Маматхоновни у ерга нима етаклади? Пулми? Ёки Мальдив оролларида тўп сурган ҳолда фаолиятини ўстирмоқчими? Агар шуни ўйлаган бўлса у ҳолда ўзимизда ҳам тўп сургани яхшироқ эди, тўғрими? Футболчимизга шу савол билан мурожаат қилганимизда шундай деди:

-  Ҳар бир футболчи фаолиятини пулга таққосламаса керак. Ўзим шунчаки фаолиятимни бошқа мамлакатда давом эттириб, тажриба орттиргим келди. Янги мамлакат, янги ҳаёт ва бошқа инсонлар...менга янги чақирувлар жуда қизиқ, ҳаётда. “Навбаҳор” ўринбосарлари таркибида тўп сурган пайтимизда Фарғонада “Ҳоким Кубоги”да қатнашгандик. Ўшанда Қирғизистоннинг “Олой” жамоаси мураббийларининг эътиборига тушганман ва мени таклиф қилганлар. Ўшанда ҳам “Олой”га иккиланмасдан боргандим. Янги чақирувлардан ҳеч қачон қочмайман ва бу менга қизиқ.

Хаёлимизга яна бир савол келди: балки Маматхоновнинг Мальдивга кетгани “Шўртан”даги молиявий муаммолар билан боғлиқмикин? Ҳар холда ғузорликларда бу борада қийинчиликлар юз бераётгани ҳақида эшитгандик.

-  “Шўртан”да тўп суриб юрган кезларимда клубда молиявий муаммо фақат мукофот пуллари билан боғлиқ эди. Ойлик маошлар бўйича муаммо йўқ эди. Жамоани тарк этганим пул билан боғлиқ эмас. Мальдивда футболчиларга тўланадиган иш ҳаққи албатта ўзимизнинг про-лигадан анча тафовут қилади. Суперлигамиз билан таққослайдиган бўлсак, у қадар катта фарқи йўқ, - дея бу борада ҳам муносабатини билдирди, Маматхонов.

Майли, ҳар қандай ҳолатда ҳам янги легионеримизга ўзи ўйлаган ниятларига эришишини тилаб қоламиз. Қарор ўзиники ва нима қилиш унинг ихтиёрида. Мулоқотимиз якунида Мирзоҳид қанча муддатга шартнома тузгани, Мальдивда чемпионат қандай форматда ўтиши ва клуби қандай шароитлар қилиб бергани тўғрисида айтиб ўтди. 

-  Клуб билан ўртамиздаги шартномам 2021 йилнинг 31 июлигача амал қилади. Мальдивда чемпионат 8 декабрдан старт олади ва июлга қадар давом этади. Клуб менга пойтахт Маледан икки хонали квартира берган, у ерда бир ўзим истиқомат қиляпман. Шароитлари кўнгилдагидек. Клубнинг ресторани бор, ўша ерда бемалол қорнимни тўйдираман.