Ҳусанов рад этилмайдиган шартнома олади!

“Манчестер Сити” раҳбарияти жамоанинг икки ҳимоячиси бўйича якуний қарорга келди ва уларни узоқ муддат таркибда сақлаб қолиш учун “янги ва яхшиланган” маош шартларини таклиф этадиган бўлди.

Айни пайтда “шаҳарликлар” ўнг қанот ҳимояси етакчисига айланган Матеуш Нуньеш ва марказий ҳимояда порлаётган Абдуқодир Ҳусанов билан янги ва шартлари янада яхшиланган шартномалар тузиш имкониятини кўриб чиқмоқда.

Нуньеш ушбу мавсумда “Манчестер Сити”нинг энг яхши ўйинчиларидан бири бўлиб, асосий ўнг қанот ҳимоячиси сифатида ҳаракат мавқеини мустаҳкамлаб олди.

Ҳусанов эса 2025 йилнинг январида “Ланс”дан ўтганидан бери “Манчестер Сити” ҳимоясида муҳим ўйинчи даражасига кўтарилди.

Англия оммавий ахборот воситалари, хусусан, cityxtra.co.uk нашрининг маълум қилишича, клуб раҳбарияти жорий мавсумда катта ўсиш кўрсатган бу икки ўйинчини янги битим билан мукофотлаш лозим, деган хулосага келди.

Матеуш Нуньеш аслида ярим ҳимоячи бўлишига қарамай, жамоадаги вазиятдан келиб чиқиб, ўнг қанот ҳимоясида ўйнаяпти. Бу мавсум португалиялик футболчи бош мураббий Хосеп Гвардиола қўл остида янги позицияга тўлиқ мослашганини намойиш қиляпти.

Португалиялик ҳужумкор футболчи ушбу мавсумда барча мусобақаларда 30 дан ортиқ ўйин ўтказди ва яқинда клубдаги 100-ўйинига етганидан кейин ўз таассуротлари ҳақида илиқ фикрлар билдирди.

Нуньеш 2023 йилнинг ёзида “Вулверхэмптон”дан 53 миллион фунт стерлингга “Манчестер Сити”га ўтган эди ва ҳозирга келиб, жамоанинг энг универсал ҳамда ишончли ўйинчиларидан бирига айланди.

Унинг бутун мавсум давомида ўнг қанот ҳимоячиси позициясидаги ажойиб ўйини клубни тарк этган Кайл Уокерга ўринбосар излашни деярли кераксиз қилиб қўйди.

Шу билан бирга, Абдуқодир Ҳусанов “шаҳарликлар” сафига қўшилганидан бери Англия Премьер-лигасининг энг истиқболли ёш ҳимоячиларидан бирига айланди ва марказий ҳимоядаги ишончли ўйинлари орқали барчанинг эътиборни тортди ва кенг футбол жамоатчилиги томонидан мақтовга сазовор бўлиб келмоқда.

Ўзбекистон миллий терма жамоаси ўйинчиси қисқа фурсатда “Этихад” стадионида мухлисларнинг севимли ўйинчисига айланди ва унинг “Реал”, “Арсенал”, “Челси”, “Ливерпуль”, “Манчестер Юнайтед”, “Ньюкасл” каби жамоаларнинг энг зўр ҳужумчиларига қарши ҳаракатлари экспертлар томонидан алоҳида эътироф этиляпти.

Ҳусанов эса ўтган йил январда 40 миллион евро тўлаб, шошилинч трансфер сифатида олиб келинган бўлиб, 15 ой ичида номаълум ўйинчидан Гвардиола асосий таркибидаги етакчи ҳимоячилардан бирига айланди. Бу жуда таъсирли ўсиш бўлиб, “Манчестер Сити” уни албатта мукофотлашни режалаштирган.

Хабар қилинишича, бу икки ҳимоячининг  жамоадаги маоши оширилиши кутилмоқда.

Нуньешнинг “Этихад” билан шартномаси 2028 йилнинг ёзигача, Ҳусановники эса 2029 йил ярмигача амал қилади. Яқин орада уларнинг шартномаси тугаш хавфи йўқ. Шунга қарамай, “Манчестер Сити”нинг уларнинг маошини ошириш қарори бу икки футболчининг жамоа учун аҳамияти ортиб бораётганини ва спорт директори Уго Виананинг клуб келажагини энг истиқболли ўйинчилар атрофида қуриш истагини акс эттиради.

Бу қарорлар “Этихад”даги кенг кўламли шартнома ишлари доирасида амалга оширилмоқда, бу жараёнда манчестерликлар “Олтин тўп” соҳиби Родри ва Фил Фоден билан битимни узайтиришга ҳам устувор аҳамият бермоқда.

Спорт директори Уго Виана жамоа етакчиларига янги шартнома бериш орқали келаси мавсумлар учун жамоа ўзагини шакллантиришга интилмоқда.

“Манчестер Сити” шунингдек ёзда кўплаб футболчилар кетишига тайёргарлик кўрмоқда, шунинг учун жамоа қайта қурилаётган шароитда асосий ўйинчиларни сақлаб қолиш янада муҳим аҳамият касб этмоқда.

Эслатиб ўтамиз, аввалроқ sports.uz портали Абдуқодир Ҳусанов “Манчестер Сити”да амалдаги шартномаси бўйича қанча маош олаётгани ва бу сумма ўзгариши мумкинлиги ҳақида қуйидаги мақолада ёзган эди.

Миллионер! Ҳусанов “Сити”да жами қанча маош олади?

Еврокубокда ўйнайдиган клуб ўзбек футболчиси трансферини эълон қилди

Ўзбекистон: Бу галги рақиб Аргентина ва Бразилияни қўрқитган жамоа!

Ҳусанов рейтингда биринчи!