Про лигадан ҳам Туркияда йиғин ўтказадиган жамоа бор ёхуд "Торпедо"га қарши ўйин, шартнома тузган футболчилар ва Кумиковдан муносабат

Суперлига клублари билан бир қаторда про лига вакилларининг ҳам тайёргарлиги айни қизиган палласида. Айниқса, элитага қайтиш учун асосий фаворитларга бўлган эътибор каттароқ. Жумладан, “Андижон” клуби ҳам ўтган йилги муваффақиятсизликдан сўнг про лигага равона бўлганига қарамай, раҳбарият қўл силтаб қўйгани йўқ. Қайтанга, ўзига яраша иштиёқ билан жамоани яна Суперлигага олиб чиқиш йўлида саъй-ҳаракатлар олиб бориляпти.

Хабарингиз бор, ўтган йилдан жамоага бош мураббийлик қилиб келаётган Виктор Кумиковга яна ишонч билдирилган бўлиб, россиялик мутахассис “Андижон”ни чемпионатга тайёрлаб боряпти. Унинг ўзи учун ҳам “Андижон” билан про лигага тушиб кетиши оғир ва энди жамоани яна Суперлигага қайтариши жуда муҳим.

Клубнинг тайёргарлигига тўхталсак, ҳаммасини ўз қароргоҳидан бошлашди. Кейин Хонободда йиғиннинг навбатдаги босқичи ўтказилди. Шу билан бирга клуб Фарғонада “Ҳоким Кубоги” мусобақасида иштирок этди. Кумиков жамоаси ўша турнирда финалгача етиб борди ва ҳал қилувчи баҳсда Суперлига жамоаси – “Қўқон-1912”га 1:0 ҳисобида мағлуб бўлди. Умуман айтганда, Фарғонадаги мусобақа ҳам андижонликларнинг мавсум учун тайёргарлигига яхшигина хизмат қилди. Виктор Кумиков учун бу турнир айни муддао бўлди.

Эндиги манзил Туркия! Ҳа, Суперлиганинг аксарият клублари Анталияда йиғин ўтказаётганида про лигадан ягона вакил сифатида “Андижон” ҳам ўша ерда ўқув-машғулот йиғинини ўтказадиган бўлди. Режа бўйича “бургутлар” 10 февраль куни Туркияга жўнаб кетади ва у ерда икки ҳафта мобайнида шуғулланади. Шу вақт ичида бешта назорат учрашуви ўтказилиши ҳам кўзда тутилган. Бизга етиб келган маълумотга кўра, ҳозирча иккита рақиб номи маълум. Булар – Россиянинг “Олимп” ҳамда “Торпедо” клубларидир.

Вақти-вақти билан “Андижон” бош мураббийи Виктор Кумиков билан жамоадаги вазият ва тайёргарлик хусусида гаплашиб турамиз. Бу сафарги ўзаро мулоқотимиз қисқароқ давом этди.

- Виктор Балютович, селекциядан қониқяпсизми ёки...

- Про лигада ўйнашимизни ҳисобга олсак, ҳа. Қониқиш ҳосил қиляпман. Балки яна 1-2 нафар футболчи олармиз. Буни вақт кўрсатади, кўрамиз.

- Жамоангиз энди Туркияда йиғин ўтказади. У ерда асосий эътибор нимага қаратилади?

- Тўғри, биз Туркияда шуғулланамиз. Ушбу хориж йиғинида техник-тактик машғулотларга асосий урғуни бермоқчимиз. Албатта, назорат ўйинлари ҳам бўлади. Ҳозирча фақат 14 февраль куни “Торпедо” Москвага қарши ўйин бўйича келишиб қўйилган.

- Про лигада фақат “Андижон” Туркияда ўқув-машғулот йиғинини ўтказиш учун жўнаб кетяпти. Бу йиғин мавсум давомида жамоангизга қандай устунлик бериши мумкин?

- Шунчаки, Туркияда мавсумга тайёргарлик кўриш учун барча қулай шарт-шароитлар муҳайё. Бунинг қандай фойда беришини эса бошланажак мавсум кўрсатиб беради.

- Клубни Суперлигага қайтаришга ваъда бера оласизми?

- Бизнинг олдимизга муайян вазифа қўйилган. Албатта, уни бажаришга ҳаракат қиламиз.

- Таркибга қўшилган янги легионерлар хусусида фикрингиз қандай? Улар жамоани қанчалик кучайтиришлари мумкин?

- Улар худди ўзимиз ўйлагандек жамоа учун керакли, шунинг борасида анча тажрибали легионер футболчилардир. Табиийки, бундан мен қониқдим. Улар клубни кучайтириши аниқ.

- “Андижон”ни про лигадаги асосий фаворит, деб ҳисоблайсизми? Бу йўлда қайси жамоалар сизлар учун рақобатчига айланишади?

- Қайси жамоалар фаворит бўлиш-бўлмаслигини билмайман. Ўз-ўзидан шуниси аниқки, аксарият клублар мавсумни олдиларига қўйилган вазифани бажариш мақсади билан бошлайди.

Бош мураббий анча хотиржам гапирди ва жамоасига ишонаётгани табиий. Барчаси унинг режаси асосида кетяпти. Таркиб бўйича ҳам вазиятдан келиб чиққан ҳолда қониқаётганини айтди.

Дарвоқе, селекция ҳақида. “Андижон” деярли ўзига керакли футболчиларни қўлга киритди. Ўтган йили Бангладеш чемпионатида ўйнаб қайтган, асли “Андижон” футболи тарбияланувчиси Илдар Маматказин яна собиқ клубига қайтди ва шартномага имзо чекди. 2019 йили Ўзбекистон U-23 терма жамоаси билан Осиё чемпионига айланган Илҳом Алижонов ҳам янги мавсумни “Андижон” сафида бошлайди. “Насаф”, “Қизилқум”, “Навбаҳор” каби клубларда тўп сурган ўйинчи андижонликлар билан икки йиллик шартнома имзолади. “Бунёдкор”дан таклиф қилинган ҳужумчи Шаҳбоз Эркинов тўлақонли равишда “Андижон” аъзосига айланди.

Шунингдек, дарвозабон Хуршид Хўжаев яна собиқ жамоасига қайтди. Тез орада Бобур Давлатов билан шартнома тузилиши кутиляпти. Кумиков қониқиш ҳосил қилаётган легионерлар – Владимир Бубанья, Горан Милойко ва Богдан Милич шартнома имзолаганини қўшимча қилмоқчимиз. Қолаверса, янги ёш иқтидор эгалари ҳам жамоага жалб қилинган. Ўтган йилги таркибдан айрим етакчилар сақлаб қолинган. "Андижон" про лигада асосий фаворит эканини амалда кўрсата оладими? Буни мавсум давомида билиб оламиз.